Russian Defence Ministry leiin an chimmi cu 'kan hnu thla i kan raltuknak vanlawng nih ISIS a kahnak ah ISIS hruaitu Abu Bakr al-Baghdadi a thi kho men ko' tiah a chim. May 28 ah khan Raqqa khaupi pawng i meeting an tuah lioah an kah hna.
Report nih kip nih an tial ning ahcun 'ISIS meeting an tuah lioah an hruaitu Abu Bakr al-Baghdadi zong aa tel ve. An meeting tuah lioah cun fak taktak in an kah hna' a ti. US lei upa nih cun 'fiang tein kan chim kho rih lo' tiah ISIS dohtu US lei bu biachimtu Col. Ryan Dillon nih a chim.
ISIS hruaitu Abu Bakr al-Baghdadi a thi cang tiah thanwgpang hmaan lo a rak thang lengmang. Asinain a rak thi taktak bal lo. May 28 i an meeting ah an kahnak ahcun a thi ko lai tiah an zumh. An kah lio hna hi Raqqa khua in zeitin dah kan zam khawh ning a si lai timi kong an i ceih hna.
Russian Defence Ministry lei nih an chim thanmi cu 'meeting an tuah ah hin minung tampi an thu hna lo. Drone in an kah lengmang hna tikah ralrin taktak in an um lengmang. Abu Bakr al-Baghdadi a thih taktak ko ahcun ISIS caah cun sungh taktak a si ko lai' tiah a ti.
CNN leiin Mark Hertling nih a chimmi cu 'Russian lei chimmi hi ka zum colh rih lai lo. ISIS hruaitu hi voinga tiang a thi cang tiah kum thum chung kan theih cang, asinain a thi taktak bal lo' tiah a chim. Ref: CNN News.