President Trump nih khuacaan thlen dohnak (climate change) kongah US kan i tel kho lai lo tiah biachahnak a tuahmi kongah North Korea nih an vun phomh len. 'Kan vawlei pi caah tihnung bikmi pakhat a simi khuacaan thlen dohnak ah Trump aa let awk a si lo' an ti.
Korean Central News Agency nih a tial thanmi cu '2015 i Paris ah hnatlaknak rak tuah cangmi khuacaan thlen dohnak Trump nih a let tak thanmi cu mahzawn lawng ruah tuk bia le lungput that lo tuk bia a si' tiah an vun phomh len ve.
"American First' timi policy hi hruh tuk bia zong a si i, khuacuanh khawh lo tuk bia zong a si. Vawleicung khuacaan runven tham cu anmah ca thatnak pei a si ko cu. Theih lo tuk bia a si ko' a ti. A tial thanmi cu 'nihin ah kan vawlei caah tihnung cemmi cu khuacaan thlennak nih a chuahtermi linhsatnak a si' a ti.
Khuacaan thlen dohnak kongah North Korea hi thazaang petu pakhat a si. Asinain human rights kongah a thangchia tukmi ram a si. Khrihfami hremtu ah a thawng bikmi ram pakhat a si. Cun North Korea nuclear le missile nih vawleicung thinphang in a tuah lengmang hna.
Ramdang zong nih Trump cu an soisel ngai, asinain President Trump nih a chimmi cu:
'Khuacaan thlen dohnak caah hnatlaknak kan tuahmi nih kan mipi harsa tuk in a chiah hna. Kan pawngkam ram runvennak kong zong ah hlawh a tling lo. Pawngkam ram a dirkamhtu ka si ko asinain hi khuacaan thlen dohnak nih thatnak a kan pekmi naak in kan mipi dan a tatmi hna a tam deuh' a ti. Ref: TCP.