US Congress pi ah FBI Director thing James Comey biachim cu a ropui ko. American mipi hrimhrim nih riantuan loin an thut hnawh i an zoh cio. Khua chungah tlanglawng in aa vakmi an tlawm te. Cheukhat tlanglawng cu ahohmanh aa citmi an um lo. Zu dawr (Bar) ah an khat dih hna.
Suimilam pahnih leng bakte Congress upa hna hmaiah James Comey cu voi 600 leng bia an hal. A leh khawhmi tampi lakah mipi lakah leh awk a tha lo timi cu inn khaan hrenh chungah a leh than te hna lai. US politics tilian a lian chin lengmang rih lai.
James Comey nih tu chun ah a chimmi hna hi cu a phichuak an si rih lo. 2016 US thimnak ah Russia nih an luh hnawh hna i US thim tiluan an pialtermi kong hlathlainak ruangah Trump nih a rian a phuahnak tiang lawng a si. A phichuak taktak cu Comey hmaban a pekzulhtu Robert Mueller nih a phuan te lai.
Robert Mueller hi Russian le Trump karlak pehtlaihnak hlathlai ding in rian an khanhmi a si.
Tu chun ah Comey nih a chimmi cu Russian le Trump riantuantu pehtlaihnak kong an hlatmi i Trump nih nan kan hlatmi hi ngol cang ko tiah a thlohnak kong hna an si. Comey nih cun 'Russian nih US thimnak lam an pialter ko tiah a chim. Trump nih kan hlathlaimi phichuah lai a tih caah a ka phuahmi a si' a ti.
Senate Intelligence Committe he inn hrenh chungah tonnak le biahalnak an ngei than lai i, Russian le Trump karlak ah zeitiang dah pehtlaihnak a um timi a lang than te lai. US politics tilian a thawng chin lengmang lai timi theih khawh a si cang. Cun Comey hmaban pehzulhtu Robert cungah tuanvo nganpi a um rih.
President Trump cu Washington DC i Faith & Freedom Coalition pumhnak ah bia a chim cuahmah lio a si ve. Bible caang a relpiak hna i Pathian kong zong a chim chih hna. 'Kan fale nih Pathian an theih awh a si' tiah a chimh hna.
A dohtu hna cu 'lih an chim lai. Kan riantuannak dawnhkhanh peng an i zuam lai. A kan huatnak an karhter chin lengmang lai. Asinain kan lungput kan thum lai lo. A hmaanmi kan dir peng lai. Tinhmi pakhat lawng ka ngei. American mipi caah ka dir peng lai. Kan doh lai i kan tei ko lai' tiah a chim.