US in meng 95 hrawng aa hlatmi Communist ram Cuba le US hi aa ral ngaimi an si. Asinain President thing Obama chan ah khan pehtlaihnak an ser i kum hnih chung hrawng cu an vun tluang ngaimi a vun lo. Asinain Trump cozah nih an linhsatter than dih.
Ningani ah President Trump nih Obama cozah tangah US le Cuba pehtlaihnak sermi cu a vun thlen than. Ram hnih karlak khuatlawnnak le sipuaizi pehtlaihnak rengh than ding in Trump nih a chim. Human rights upatnak an ngeih lo chung cu UN nih dantat rih seh a ti.
Cun Cuba nih North Korea ah hriamnam a kuat i Venezuela zong dai thiam loin buainak a ser lengmang. Sualnak ngei lo mipi zong thong a thlak hna i tapung zong a bawmh lengmang. Minung fir hmang zong thazaang a pek hna a ti.
Cuba cozah nih an rak phomh colh hna. Trump cozah hi human rights a let hnih in a buarmi nan si. Human rights upatnak a um lo, lainawnnak a tam tuk, police nih ningcang loin African-American an ralchanh hna. Miphun thleidan nan hmang.
Lahkhah tlukceonak a um lo, mipem thleidannak a um, Mexico vampang chon aa tim, khuacan thlen dohnak min a thutmi a let than ..etc tiah Trump cozah nih an tuahmi vialte a langhter dih. Trump nawlngeihnak minthut vialte hna hi 'hnulei kirnak lam' a si tiah an vun den chih ve hna.
Trump nih cun 'Cuba ramkhel thong an chuah hlan lo le ding tein thimnak a um hlanah cun Cuba le US chawlehthalnak lam kan rengh rih ko lai' tiah a chim. An tuanbia hlun ah kir than dawh in an um cang. Ref: CNN News.