Nilini ah Iran drone nih US le a hawile umnak hmun a rak kah hna. Syrian ralkap umnak hmun chaklei At Tanf khua leiin rak mongh (control) mi a si. Iran dirkamhmi tapung Shia raltho nih a voikhatnak a kan kah a si tiah US ralkap upa lei nih an chim.
Syria in chaklei At Tanf leiin a rak zuang i a kan kah. Kan raltuknak vanlawng F-15 nih a zuan hnawh colh i puak lak in a kah tiah US official nih a chim. A kan kah len nain zeihmanh hmual a ngei lo a ti. A kahnak hna hi training an kainak le ISIS an dohnak hmun hrawnghrang a si.
Buainak ser lo ding kan timi hmun ri khiahmi chungah Syrian ralkap le a hawile an um len rih ko hna. Kan caah ral an si ahcun kan kah colh ko hna lai. Nilini zong ah US raltuknak nih Syrian ralkap bawmtu tapung motor pathum an kahpiak than hna.
Ri kan khiahmi chungah an lut. Atu tiang ah cun anmah kahnak in ISIS hi kan hmuitinh deuh rih an si' tiah a chim chih. An kahmi hna ah a thimi an um le um lo cu a fiang lo nain aa hliammi cu an um. Russia le US an i chawn colh i Russia nih Syria sinah bia an thlah colh.
Mah hnu cun motor sawhsawh a rak ra i aa hliammi a phurh hna. Asinain a rauh hlanah hriamnam he tapung an ra than i US nih a phomh than hna. Syria an siah Russia an siah US an siah ri an i sermi chungah a lutmi poah cu i kah a si lai an ti bantukin US hmun chungah tapung an luh ahcun an kah lengmang hna.
Russian zong nih an hmun chungah US dirkamhmi tapung a va luh ahcun an rak kah ve hna. US raltuknak vanlawng F/A-18 nih voili bakte bom a thlak hna i tapung 10 hrawng an thih pinah an motor vialte an hrawhpiak dih hna. 'Kan caah tihnung an si caah kan kahmi hna an si' tiah US official nih an chim. Ref: CNN News.