Kan hnu zarh thimnak i a sunghnak nih fak ngaiin Clinton lung a fahter. Asinain a chim lo. Nithumni zan i Children Defense Fund ah bia a chimnak ahcun a tuarnak a phuan cang. 'Tu zan nan sin langh hi a fawi lo bik a si' tiah a chimh hna.
Clinton hi a nu nih a hngakchia lio in a rak kal takmi a si i, nithumni ah zan ah lunghno ngaiin a chimmi cu ka nu sinah kaa zuamnak vialte hna hi zeitluk in dah chim ka duh hna. Ka hlawhtlinmi hna ka zoh tikah ka rak i zuammi vialte hna an rak phu ko a ti.
'Kan chimh ko hna lai, tu zan nan sinah rat i nan hmaika dir hi ka caah a fawi hrimhrim lo' tiah Clinton nih a chim. A pehmi cu 'kan hnu zarh in ka duh bikmi cu inn ah um i a thami cauk pakhat le uico hna he um hi ka duh cem' a ti. Asinain a sunghnak kong a ruahnak nih a thazaang a derter lo i, a hmailei tu a ruat peng.
A nu nih Clinton le a nau nu cu tlanglawng a rak citter hna i an pule sinah California ah a rak kalter hna. An pu le nih tha tein an zohkhanh hna lo tikah a khua Chicago ah a rak i thial than. Nithumni zan ah a chimmi cu tlanglawng cungah khan ka nu he thut ti i zeitluk in dah biaruah ka rak duh a ti.
'Ka nu pawng te ah thut i a kut tlaih i, ka nu, zoh hmanh, na nung lai. Nangmah tein chungkhar na ngei lai: fa pa thum' tiah a lunghno pah buin Clinton nih a chim. A peh thanmi cu 'na fanu a thang lai i, United States Senator a si lai; Secretary rian ka tuan lai i kan ram ka aiawh lai; President cuhnak ah 62 million vote ka hmuh ka ti lai' tiah a nu sinah biachim ding saduh a thahmi cu hngakchia sinah a chim.
'Kan ram, kan fale, kan chungkhar caah riantuan ding kan ngei. Kan in herh hna, kan ram nih an herh hna, nan thazaang le nan thiamnak kan in herh hna' tiah a chimh hna. 'Sifahnak tangah American hngakchia an um chung le tihnak in an um chung paoh cu riantuan ding kan ngei. America ca lawng si loin vawlei pi ca tiang ah riantuannak kan ngei' tiah Clinton nih a chim.