Breitbart News lutlai a simi Steve Bannon cu US Inn Raang pi ah Chief of Strategist caah Trump nih a thimmi cu aho lung hmanh a tong lo. Bannon nih Chief of Strategist a tuan ahcun vawleicung security caah tihnung taktak a si tiah minthang American civil right attorney Bryan Stevenson nih CNN ah a chim.
'Huatnak konglawng te a chimmi minung Trump nih a thimmi hi cu kan ram caah tihnung a si ko. Kan ram cu vawleicung ram ah lungput in a siah ziaza in a siah thil ti khawhnak in a siah hruaitu dirhmun ah a um lengmangmi a si bantukin Steve Bannon tbk minung hna kut cungah chiah cu a tihnung taktak ko' CNN Christiane Amanpour sinah a chim.
Steve Bannon hi Trump campaign CEO a tuanmi zong a si i, Breitbart news ah hruaitu zong a si. Breitbart news hi nationalism, anti-semitism (Jew miphun a huatnak) le misogyny (nu huatnak) lungput a langhter lengmangmi an si.
Stevenson nih CNN ah a chim thanmi cu 'America cu vawleicung ah, cu bantuk society kan si tiah kan au pi bantukin riantuan ding tampi kan ngei. Kan sining rup in kan sining langhter a haumi ram kan si. Kan ramchung ah miphun thleidannak hi a zual chin lengmang cang. Sifahnak zong a zual chin lengmang cang. Kan buaimi hi a tam cang tiah a chim.
A chim thanmi cu minak hngakchia pathum lakah pakhat tluk hi thong ah a tla ding in ruah a si cang. Hi bantuk dirhmun ah kan ummi nih a langhtermi cu riantuan ding tam tuk kan ngei; khuaruah thiam kan hau, fak piin biachim kan hau cang' tiah Bryan Stevenson nih CNN interview ah a chim. Ref: CNN.