US le an hawile raltuknak vanlawng nih Rawa khua ah a ummi ISIS an phomh hna. Motor pahnih in a kal liomi ISIS cu an phomh hna i, ISIS minung paruk (6) an thi tiah Major General Noman Abd al-Zaweiy nih a chim.
Rawa le Anah khua hi lak ding in Iraq ralkap le an hawile nih lak ding in an timh cuahmah lio a si. Noman nih a chimmi cu Annah le Rawa khua chung kip ah ISIS nih thing tank an ser i, tank taktak bantukin an chiah hna tiah a chim.
An duhnak sullam cu hriamnam le raldohnak an ngei ko timi theih hna seh ti kha a si, asinain cunglei in raltuknak vanlawng nih an rak theih thiamthiam ko tiah a chim chih. ISIS nih a dang an tuah thanmi cu mipi hi an phaw le an hriamnam ah an hman rih hna a ti.
US ke ralkap nih Iraq ralkap an vun bawmh cang hna. Iraq ralkap lawng nih an rak lak khawh lomi al-Zahraa, al-Tahrir, al-Samah le al-Moharibin tbk khua hna kha atu lak than ding in US ralkap he bawm in an vun nawr than cang.
Federal Police Chief, Raed Shaki Jawdat nih zarhpini ah a chimmi cu 'Mosul Airport pawng khuate Abu Saif ah kan ralkap nih ISIS hruaitu panga an thah hna, cu chungah Chechen hruaitu zong aa tel a ti. Tlangpar ah ISIS sakhan a ummi cu miakpi in an kah hna i, an hruaitu panga an thi. Ref: Iraq News.