ISIS hmunkhur ah a biapi tukmi Mosul cu Iraq le an hawile ralkap nih an kulh dih cang tiah nithumni ah ralkap lei upa pakhat nih a chim. Iraq ralkap zong Mosul lak ding in khua chungah an lut cang. Lam tonh-lam tonh i an i phomh cang hna.
The Popular Mobilization Units (PMU) nih an chimmi cu Mosul le Raqqa lam pehtlaihnak zong khar dih a si cang an ti. Syria i ISIS a ummi hna nih Raqqa leiin Mosul ah a ummi an hawile thilri herhbau an rak kuatnak lam a si. ISIS ralkap an ratnak zong a si.
Pumpek in nunnak aa thapmi hna ratnak lam zong a si. ISIS chungkhar le an hruaitu hna luatnak lam zong a si. Iraq le an hawile ralkap nih Mosul an vun lak chin lengmang tikah Raqqa lam in Syria leiah ISIS chungkhar le an hruaitu hna cu an zam hna tiah khua chung minung nih CNN sinah an chim.
Nihnihni ah ISIS Information Minister zong Iraq raltuknak vanlawng kahnak in a thi tiah nithumni ah Joint Operation Command nih a report. Information Minister Ziyad Kharufa hi ISIS video le hmanthlak kongah tuanvo ngeitu a si. An chim thanmi cu 'Mosul in nithlak lei peng ah a thlithup in Kharufa ruakvuinak an ngei tiah a chim.
Nihnihni ah ISIS nichuah-nitlak pehtlaihnak lam cu US raltuknak vanlawng nih an kah i, ISIS cawlcanghnak a kham dih cang tiah US official nih a chim. Mosul ah ISIS nih an ukmi khua hna zong khua khat hnu khua khat in Iraq ralkap nih an lak thluahmah hna.
Iraq ralkap a thimi zeizat dah an si tiah CNN nih an hal hna i, ralkap upa lei nih an chim duh lo. Kan i lim tik lawng ah kan langhter te lai an ti. Ref: CNN.