Nikhatni ah sianginn a kaimi hngakchia motor a mongmi Johnthony Walker nih hngakchia hna cu 'thih nan i ready maw' tiah voihnih tiang a hal hna hnuah a rannak in a motor cu a tlikter i, thingkung le telephone tung a pah pi hna.
Hngakchia panga an thi. A monghmi motor hi Tennessee School Bus a si. Walker 24 nih Woodmore Elementary School in a rak tin pi hna i sianginn in meng khat hrawng aa hlatnak i, lam a bitak ah a teih pi hna tiah Chattanooga Police Chief Fred Fletcher nih a chim.
Motor chungah a ummi sianghngakchia pakhat nih a chimmi cu 'rang tuk in a kan mongh pi i kan chimhmi zong a ngai duh lo' a ti. A fa a thimi nu nih a chimmi cu voi tam tuk Walker motor mongh kongah camplain ka tuah cang nain official leiin zeihmanh a um bal lo a ti tiah CBS News nih an chim.
An fale nih an thih takmi chungkhar cu an tuar a fak ko. Bia in hnemhnak biafang hmanh kan ngei lo. An lungthin kua a fak ko. An chungkhar caah thla ka campiak hna' tiah Chattanooga khuabawi Andy Berke nih a chim.
Hngakchia paruk hi fak ngaiin aa liammi an si i, paruk dang hi cu an i hliam ning a fak tuk lo tiah Times Free Press nih a chim. An i teih ning cang hi kan hlat lai tiah police officer nih a chim. Motor chung i black box zong an lak. Ref: NYP.