ISIS kut chungah Iraq khuapi Mosul cu kum hnih a um cang. October 17, 2016 in Iraq ralkap le an hawile nih lak than ding in an thawh hnawh. US le a hawile nih cunglei in raltuknak vanlawng nih an rak bawmh chih hna.
Atu tiang ah Mosul khua pi chung tiang an luh hnawh thluahmah cang hna. Mosul pawng khua a simi Zahraa, Tahrir peng le Muharibeen tbk hna cu Iraq ralkap le an hawile nih an vun lak chin lengmang hna tikah Syria le Iraq ramchung khuapi deuh timi ah uktu kan si tiah a thanhmi ISIS hruaitu Abu Bakr al-Baghdadi cu a thinphang chin lengmang cang.
Mosul khuapi lak ding in timhnak an ngeih i, biatak tein ISIS an doh hna hnuah ISIS ralkap a thimi le an tlaihmi hna hi an zate in 2,800 leng an si cang. Iraq ralkap nih an doh hna lai ah bia an cahmi hna cu 'Nineveh, kan ra lio' tiah October 17, 2016 ah an rak ti. An chim duhmi cu kan in khamh cang hna lai ti a si.
ISIS hruaitu Abu Bakr al-Baghdadi cu a thinphannak ah a thintawi chin lengmang cang tiah Reuter nih a report. Mosul khua chung i chunglei minung cakuat an hmuhmi a si. A ih hmanh ah hin bom he aa then ti lo. Ka nun buin an ka tlaih sual lai a ti i, an ka tlaih ahcun bom kaa puah colh lai tiin timh cia in a um cang.
Hmun kip ah aa thial i, vawlei tangah kip ah a um cang. A pawngkam ah a um i, a hawikawm chung minung hna hmanh kha thlithup minung a si ko lai tiah a lunghrinhmi paoh hna cu a thah cang hna. A hlanah cun capo seih le nuamh biachim a hmang tawnmi kha, atu cun a hmang ti lo. A ziaza aa thleng dih cang' a ti.
Mosul hi Sunni nih kan uk hrimhrim a hau tiah a ralkap thazaang a pek hna i a forhfial khawh hna ah hi thawngpang hi an theihmi a si. Cakuat ah aa tel thanmi cu 'nunnak pek aa timmi hna, cawlcang cang u, zum lotu hna zan kha chun ah canter cang u' tiah an hruaitu Abu Bakr al-Baghdadi nih a ti hna tiah Fox News nih a report.
An khua le an ram a zam takmi Khrihfami hna zong an kir than thluahmah cang hna, asinain ISIS nih an inn le an biakinn an rak hrawhpiak dih hna. ISIS nih hin Khrihfami hna hi fak khun in an thah hna i an hrem hna. Muslim community chung hmanh ah an zumh ning in a zum lomi hna cu an hrem hna i an thah thiam hna. Ref: The CP.