Muslim ram Middle East ah Muslim hruaitu pakhat a simi Munaf Ali (a security caah min deu a hmanmi) cu a riantuannak in inn ah a rak tin. Ruah lo piin mah hngal loin a um i, a tlu colh. A chungkhar nih an lak ahcun a thi cang.
A thih chungah hmuhnak a ngei. A thawhthan hnuah a chimmi cu 'ka thih chungah ka thlarau lak awk ah khuachia an ra. 'Kal u, Allah khuachia hna. Ka thlarau laknak nawl nan ngei lo tiah ka hro hna' a ti.
Khuachia pakhat nih a leh i, a timi cu 'na thlarau lak hi kanmah nawl a si. Kanmah sinah na um cang lai' a ka ti tiah a chim. Khuachia he an i al cuahmah lio ah cun Jesuh Khrih cu a vancung mi hna he an rungtum i khuachia cu an thawl hna a ti.
Jesuh Khrih nih Munaf Ali cu 'ka fapa, ka bia ngai hmanh, Satan ruangah Adam cu Pathian nawl a ngai lo i, sualnak ah a tlu. Keimah hi a pahnihnak Adam ka si, Pathian Bia, khamhtu Messiah Jesuh Khrih ka si. Nu thiang Mary hrinmi ka si. Adam le a cikor minung vialte hna khamh awk ah a chuakmi sualnak ngei lo ka si' tiah a ka chimh a ti.
Jesuh nih a peh than 'vailam ah an tah i, Pathian fa si awk ah nangmah khamh ding in a thimi ka si. Thihnak in a tho than i, zungzal nunnak pek awk ah vuncung kutkhar an onpiaktu ka si. Keimah ka zum law ka tehte na si lai. Na nunnak kan pek than lai zeicatiah nunnak pek thannak nawl ka ngei' tiah Jesuh nih Munaf cu a chimh.
Ruah lo piin Mmunaf cu a vun i thang than. A hmuhmi cu a khuaruahhar tuk. Asinain rau loin a nunnak cu Jesuh Khrih a pek colh. Jesuh Khrih he an i tonnak kong vialte a chungkhar a chimh dih hna. An chungkhar tling in Khrihfa ah an cang dih. Cu hnu thok cun Jesuh Khrih zultu tha le a tehte tha ah a cang.
A hruai tawnmi Muslim community nih an chungkhar in an hrem tuk hna caah an inn tiang in an chuak tak dih tiah Christian Today nih a report..
Muslim ram ah Khrihfami hna hremnak hi celh ding a si lo. Pathian thawngtha chim a har tuk caah Muslim nih hrinthannak an hmuhnak bik hi Jesuh Khrih hmuhnak le tonnak deuh a si ti hi an chim lengmangmi a si. Ref: The Christian Times