Atu lioah Russia le US an i dan tuknak cu Syria ramchung buainak kongah hin a si. Amah hlanah President a tuan cangmi keneh maw a zulh te lai i, amah nih a rem a ti ning in dah Syria ramchung buainak a phisin te lai timi ruah an ruat ngai.
Syria ramchung buainak ah hin Russia nih Syria cozah President Bashar al-Assad a bawmh i, US tu nih cun Assad thlak an duh i, cozah dohtu tapung an bawmh hna. Kap hnih an lung an hmu kho lo. Russia raltuknak vanlawng nih US bawmh tapung a kah hna tikah US nih an duh ve lo; US nih fak deuh a kah ve hna tikah Russia nih an duh ve lo.
Syria ruangah hin Nuclear Superpower timi Russia le US doh khawh an si. Kap hnih in hnatlaknak le minthutnak kan tuah lai an timi zong a tlamtling kho lo. A ni le caan a phak lai taktak ah pakhat a nuar tbk in an um i cabuai cungah thut khawh dawh an si ti lo. Trump nih zeitin dah a ruah ve lai timi an zoh lio pi a si.
Atu tiang ah cun Trump nih a chim lengmangmi cu Russia le US hi rian kan tuan ti lai i, ISIS tapung hi kan hrawh dih hna lai tiah a chim. Russia nih an hnatlak pi ngaimi a si. Cun Russia nih Ukrain in Crimea a lak ruangah US nih economic dantatnak a khinh. Russia a thinhung tuk.
Russia nih an duhmi cu Crimea a lakmi hi US nih kan cohlanpiak seh law Ukrain le Syria ah hin Russian duhnak tlinter ve seh ti an duh. US nih a cohlang kho lo. Trump nih zeitin dah a phisin te lai timi hi an zoh lio a si fawn.
Cun Russia nih an duh thanmi cu NATO nih Europe Nichuah lei i an pennak an kauhter chin lengmangmi hi kir than hna seh law missile runvennak an chiahmi zong hi ngol than dih hna seh ti an duh. Hi kong vialte hna hi Russia le US entainak a ngeihtertu lawng an si. Trump nih a phisin khawh ahcun kap hnih a tluang dih an si.