Russia President Vladimir Putin nih President Donald Trump cu phone in a rak chonh i, kan ram hnih karlak pehtlaihnak kan remh lai tiah ruahchannak an ngeihmi an chim veve.
President naa timhtuahnak ah hlawhtlinnak um ko seh tiah Putin nih duhsak bia a rak chim.
Campagin lioah Trump nih Putin thangthatnak bia a chim lengmang. Phone an i chonh ah cun Trump nih 'Russia le US karlak pehtlaihnak tha ngeih an duhnak' a langhter ve. President Obama nih report tu hna sinah a chimmi cu 'NATO he rian kan tuan ti lai tiah timhnak a ngei ko' tiah a chim.
Tuan deuh ah khan cun Donald Trumpp nih NATO zong a soisel len hna. 'An hlun' cang a rak ti. Asinain Inn Raang i Obama le Trump tonnak ah NATO kong an i ruah. Trump nih NATO a dirpinak zong a chim than.
Putin le Trump nih Syria kong zong an i ruah. Atu lio US-Russia pehtlaihnak kongah an pahnih in an lungtlin lonak an langhter veve tiah Kremlin nih a chim. Pumpak in ton ding zong in timhnak an ngei i ni le caan an chim rih lo.
Russia le US karlak i pehtlaihnak a hrawk ngaimi cu Syria ramchung buainak, Ukrain le Edward Snowden kong hna hi an si.