Special Air Service (SAS) hi British special ralkap (commando) an si i, a min thang taktakmi an si. Israel special ralkap 'Matkal' bantuk an si. A tihnung taktakmi hmun ah an thlah hna i, ral nih tlaihmi khamhtu hna caah hmanmi an si. An training le an cawnnak hrimhrim a sang i, a thiam taktakmi special ralkap an si.
Atu hi Christmas a vun nai chin lengmang. Mipi lengah an chuak chin lengmang i, dawr kalmi zong an tam chin lengmang tikah Paris ah ISIS nih mipi an puah hna bantukin an kan tuah ve sual lai tiah mipi congtu ah SAS ralkap an hman hna lai. Mipi sin zongah an i cawp thup lai i, inn cunglei zong in sniper meithal in an rak runven hna lai.
British kan khuapi zong hi ISIS kut in a him lo khomi kan si tiah mipi zong thinphan dai loin an um hna. SAS ralkap nih mipi an umnak kip ah a chungin a siah a lenglei in a siah tha tein an congh dih hna lai. An tuan dingmi cu 'Operation Temperer' tiah an auh. Paris bantukin ISIS puahnak a um ahcun ralkap 5,000 leng hman ding in an i tim.
SAS pinah ralkap, police le raltuknak vanlawng tiang hman an timh hna. Paris ah khan motor ngan pi hmang in ISIS pa nih mipi a pah hna. Minung 84 an rak thi. Atu zong Paris style in motor tbk hmannak a um than ahcun sniper nih kan kah lai ti a si. Kha bantuk thil cang sual seh law zeitin dah kan kham manh ning a si lai timi training zong an ngei.
ISIS minung pakhat nih motor mongh in mipi pah a timh hna ahcun sniper meithal in a engine khawhnak lam training tha tuk in an cawng. A tli liomi motor engine kah kha a motor khamnak caah a tha bik a si tiah an hmuh. Ref: The Sun.