Syria cu ramchung buainak ruangah a kuai in a kuai i, minung a tingting in an thi i, a tingting in ram an zam tak.
Cozah ralkap le dohtu ralkap dong loin an kap. Khrihfa he Muslim he harsatnak chimpit in an tong. An harsa kho taktak hna. Thihnak nih ni fatin in a tlunh rih hna. Asinain Khrihfami hna nih thathnemnak theipar an rak zun cuahmah ve.
Cozah ralkap le dohtu ralkap dong loin an kap. Khrihfa he Muslim he harsatnak chimpit in an tong. An harsa kho taktak hna. Thihnak nih ni fatin in a tlunh rih hna. Asinain Khrihfami hna nih thathnemnak theipar an rak zun cuahmah ve.
Syria ah hin Khrihfami 200,000 hrawng an rak um. Asinain ramchung raltuknak ruangah atu hi cu 20,000 in 40,000 karlak hrawng lawng kan tang cang an ti. Pastor Alim (security caah min deuh a hmanmi) nih a chimmi cu ka Khrihfabu nih thla fatin in Khrihfami he Muslim he minung 2,000 hrawng lengmang hi kan bawmh hna a ti.
Bompuah thawng le meithal puah thawng lawng tein a khatmi Syria cu kan him kho hrimhrim lo. Nu le hngakchia hi hmun kip in kan sinah a rak phanmi an tam tuk. Kan bawmhmi hna chungah hin Muslim hi zat ceo hrawng an si. An inn man, a si-ai herh, le a dangdang an herhmi tiang in kan bawmh hna tiah Pastor Alim nih a chim.
Kan Khrihfabu nih vawlei tang khur kan cawh i dinti zong kan ngei kho a ti. Kan i pumhnak pawng te ah bom a rak puak i nu-fa an thi. Zarhpini ah pumh ka vun i tim i bom a vun puak than. Kan fale zong sianginn ah kan thlah kho hna lo. Kan lung a dong i ruahchannak a tlawm ko tiah an fale kong he pehtlai in a chim.
Alim nih thil pakhat aa fianmi cu raltuknak nih minung pakhat le pakhat a kan pehtlaihter. Kan theih bal lomi le kan hmuh bal lomi a kan tonter i, hawikawm ah kan cang dih hna. Kan lengkai hna i, hmun khat ah caan kan hmang ti kho hna. Khrihfa a si lomi tiang in camp kan ser i, an fale le an nule he tonnak kan ngei kho lengmang hna tiah a chim chih.
Ka ule pahnih hi Germany ah an um i, atu le atu hi rat ding in a kan cah tiah Alim nih a chim. Kahin Pathian nih a riantuan ding in a ka auh timi kaa fiang fawn, i laklawh in ka um pah lengmang a ti. Asinain Aleppo ah Pathian riantuan ding a um chung cu ka tuan lai ka ti. Ka nupi zong keimah bantukin Pathian auhnak a theimi a si ve.
A himnak ah nan um lai ka ti zongah kan nu nih a duh lo. Keimah he um ti i, Pathian riantuan hi a duhmi a si. Ral a thawh ahhin kan fapa hi kum 5 a si. Sianginn tha tein a kai kho ti lo. Bompuah le raltuknak nih a mang a chiatter lengmang. Hi bantukin kan dirhmun a si ko nain ka Khrihfabu kal tak ka duh hna lo. Ka Khrihfabu zong an zumhnak a thawng tuk i, Pathian nih velngeihnak a let in a kan pek tiin kan ruah a ti.
Pathian an duhnak a zual chin lengmang; an thlacam a thaw chin legmang i, kan biakinn hi thlacamtu an khat cang a ti. Muslim le Druze miphun cung tiang ah Pathian velngeihnak aa phuang cang. Anmah le an holh cio in Pathian nih a chonh hna i, a ton hna. Muslims nih an mang ah Jesuh Khrih an hmuh lengmag; nu pakhat nih a mang ah thilthuam raang aa hruk i, a hmai cer in a sermi pa a hmuh.
A thaizing ah kan biakinn ah a ra i, a therh in a therh; an ka cohlang sual lai lo ti a phang. Asinain dawtnak le lunglawmhnak in ka rak cohlan. Lunglawmhnak in kan khat hna i, Pathian dawtnak le lianngannak ni fatin in kan cungah aa phuang a ti. Media tampi nih an reportmi cu Europe ah a rak phanmi tam deuh cu Khrihfami lawng te an si an ti.
Raltuknak a um hlanah cun Muslim an rak si ko, asinain a karlak ah Khrifami ah an rak cang dih cang hna tiah Alim nih a chim. Raltuk hlanah cun cozah nawlngeitu nih Khrihfami a kan hrem ning le zumtu thar an hrem ning hna hi tih a nung i, Khrihfami kan dih te ko lai lo maw timi kan ruat, asinain atu cun aa thleng dih cang a ti. Cucaah Syria ah kan ummi hi a herh tukmi a si tiah Pastor Alim nih a chim.
Pathian nih rian a tuan ning hi aa dang cio. Raltuknak cu a hohmanh nih kan duhmi a si lo. Asinain Syrian ramchung buainak hi Pathian nih a hman i Muslim tampi nih khamhnak an conak ah a cang. Ref: Christianity Today.