Nirukni ah Donald Trump le Mitt Romney tonnak an ngei. 'Kan ruah kan phak leng tiang in biaruahnak minute 90 chung kan ngei' tiah Romney nih a chim. Secretary of State caah Mitt Romney hi Trump nih a char te lai tiah an zumh.
Asinain Trump cozah ah Mitt Romney vun luh than ding cu Russia caah mangchiat than ngai dawh a si. Russia cungah Romney hi a nem bal lo. 2012 ah President aa cuh lioah a chimmi cu 'Russia hi American kan No. 1 ral an si' a rak ti.
Asinain President thimmi Donald Trump nih cun 'Russia he pehtlaihnak tha kan ngei lai' a ti i, Russia lei zong in ruahchannak an rak ngei ngai. President a tlin cangka in Russia President Putin nih conglawmhnak bia a rak thlah colh.
Kap hnih in vawlei daihnak caah rian kan tuan ti lai timi ruahchannak an ngei.Mitt Romney hna Secretary of State a kai ahcun Russia le Trump chunmang hi a tling kho te lai maw timi ruah awk a um than ngai.
Nirukni ah Trump le Mitt ton cu an lunghmui ko. 'American a kan thathnem bi dingmi vawleicung kong kan ceih. Kan ruahphak leng tiang an si' tiah Mitt nih a chim. 'Kan ruahnak zong tete kan chim i, ruahnak thlennawnnak zong kan ngei' tiah Mitt nih a chim chih. Ref: VOS News.