January 20 hnu in cun President Donald Trump cu a zungzal in nuclear tawhtlaitu ralkap nih nuclear football or suitcase he a zulh cang lai. Zeitik caan paoh ah nuclear kahnak nawl a ngei cang. President a tuan cangmi hna cio bantukin Trump zong nih a kalnak paoh ah nuclear (suitcase) nih a zulh cang lai.
Inn Raang pi ah a siah Air Force One cung i a um a siah motor chung i a um lio a siah a kam te nuclear suitcase le a bawmtu pakhat nih an um pi zungzal cang lai. Poipang ngaiin nuclear hman a hau ti tikah hman colh khawh ding in timh cia in a um a hau cang.
President Ronald Reagan chan ah nuclear suitcase a rak phurhpiaktu Pete Metzger nih Donald Trump cu 'zeitih caan le hmun paoh ah timh cia na um a hau cang. Nuclear hman a hau timi caan le kap cang timi nawlchuah caan hi minutes tlawmpal te lawng a rau lai. A caan a tawi tuk' tiah a chimh chih.
Poipang ngaiin nuclear hman a hau cang tiah ralkap lei upa nih an chimh hnu in minute 15 hrawng amah pumpak biachahnak caan a ngei lai ti a si.
White House Military Office Director Bill Gulley nih a chimmi cu Presidential Emergency Satchel ah hin thil pali a um a ti. 1) cauk nakmi a um i, kahnak ding thim ding menu a um; 2) 3-5 lehmah saumi card a um i, president identity fehternak code a si; 3) President dornak hmun list; 5) Emergence in Broadcast system hman ning tbk hna kha US President le nuclear hman ning karlak thil um an si.
January 20 i President rian chanh ni ah President Obama sinah a nuclear bawmtu a ra ve lai i, rian chanh din in cun Trump a zul cang lai. Asinain Trump sinah nuclear code pek lai ding cu an tih ngai cio. Bruce Blair hi nuclear missile kongah officer a si. Clinton a tanhmi a si i, a chimmi cu 'Trump nih nuclear code a tlaih ding cu ka thinphang ko' tiah a chim.
Politico ah a tialmi cu 'atu le atu ti awk in Trump hi a thintawinak a lang i, thinphan dai lo a si' a ti. 'Biachahnak hmaan a tuah manh hlanah aa thlahphoih lengmang ding a si' a ti. 'Nuclear hmannak ah cun President lawng hi nawlngeihnak tling a ngeimi an si. Trump nih nuclear hmannak kongah zei bantuk policy dah a zulh te lai timi a fiang rih lo.
Metzger nih a chim thanmi cu President nih nuclear kongah biachahnak a tuahmi hi a biapi tuk. Zeidah a chuah pi lai timi hi tih a nung tuk. Vawlei muisam vialte hmanh a thleng dih khomi a si. Minung zong a kan thlen khawh i, miphun vialte zong an thleng kho dih tu a si' a tiah a chim chih. Ref: CNN.