US dirkamhmi bu le Cuban ralzam (exile) hna nih Cuba hruaitu Fidel Castro hi voi 638 thah an timh i, a luat kho lengmang. Voi khat cu a ngaknu nih thah a ka timh timi a theih i a meithal a pek. Asinain a ngaknu nih a kap kho lo.
Cuba hruaitu Fidel Castro hi cheukhat nih cun an thangthat ngaingai. Nitlak ram biatak tein a doh i, chuak lak tiang in a doh i, a dironh khotu a si an ti; cheukhat nih cun a ramchung mipi a uk ning a chia tuk an ti ve. Kawl ralkap uknak bantukin thir kuttum (iron fist) in a ram a uk ve.
1959 ah Cuba ralkap uknak a thlak i, 2008 tiang amah nih a uk hna. Vawleicung hruaitu sau bik a tuanmi a si. Cuba a uk chungah US President voi 10 an i thleng manh. Castro nih a rak chimmi cu 'thah an ka timhnak hi Olympic lentecelh zuamnak si seh law Sui Medal ka hmuh cang lai' a ti.
1960 hrawngah hin a cigar ah a puak khomi an rak chiah i, a luat; rili sawksol chungah a puak khomi an ram chiahpiak i a luat than; a bualpen ah sivai an rak chiahpiak than i a luat rih. Cuticun CIA an siah a dangdang an siah a phunphun in a nunnak lak an rak timhmi cu hlawh an rak tling lo.
CIA nih Castro ngaknu Marita Lorenze cu sivai na pek lai an rak ti. Asinain CIA le a ngaknu khuakhan vialte cu Castro nih a rak theih caah voikhat cu Castro nih a pistol a chuah i, a ngaknu cu a pek. 'Ka kap' a ti. Marita nih a hnuah a chimmi cu 'keimah hlah maw a ka kah cang lai ka ti lioah meithal cu a ka pek. Ka kap a ka ti' tiah a chim.
'A mit aa chinh i, kah ding cun a ka hngah. Ka duh i a ka duh ve caah a ka kap lai lo timi a theih' a ti. Kap kho thai loin a meithal cu a thlak i, Castro cung lehlam ah a zuang i a va pom. Cu bantuk cun thah timhnak le khuakhannak in a luat lengmang i, kum 90 a tlin November 26 lawng ah dai tein a thi. Ref: The Sun.