Kum 20, ngaknu Crystal Brooke Howell nih lainawng ka si ko tiah a sualnak a cohlan i, hmuahchih bak in ka pa lu ah ka kah ko tiah a phuan. A pa a thah khawh in a pum cu a tuam dih i a hawile he inn ah drug party an ngei.
Febuary 2014 ah US North Carolina i an inn ah a pa Micheal 50 cu sofa cungah a it. Howell cu a meithal tawite he a ra i, hmuahchih in a pa cu a lu ah thi lak in a kah. Cun a pa ruak cu puan in a thuam dih hnuah dum ah a thuh.
A pa tangka cu a lak than i a hawile he drug tonghnak caah le party caah an hman dih. Kum 20 nu Howell nih a hlanah cun ka that lo tiah aa pheh, asinain a hnuah cun ka thah ko tiah a thah ning vialte a phuan dih. Kum 30 chung thongthlak ding in a bia an khiahpiak.
A nu le pa hi a luan cia kum nga khan an rak i then. A nu Kristina Rester sin um cu a har tuk in a ruah caah a pa Micheal sinah a ummi a si. Howell hi a sual i chimhhar ngaimi a si. A pa a thah hlanah hin dawr thil fir tbk a hmang. A pa hi Columbia County-News Times sport kong tialtu a rak si.
A pa a thah thaizing ah police nih an tlaih colh. Howell nih a hawile sinah a chimmi cu 'amah le amah tein aa that' a ti. Asinain police nih an hal tikah cun keimah nih ka thah ko a ti. District attorney Ashley Welch nih a chimmi cu 'nu nih a pa thah timi cu khuaruahhar a si ko' a ti.
A chim thanmi cu 'a pa thah i a tangka a hman dih, a inn zong a hman, a motor zong a hman, a pa ruak zong a thuh fawn. A sualnak hi a fiang tuk. A pa nunnak lak le hmang in amah duh in nun a duhmi a si. Ngaihchia taktak a si' tiah a chim. Ref: The Mirror.