Trump nih President a tlinmi tham cu Russian computer thiam hacker le state sponsor group nih a thli in an bawmh caah pei a si ko cu tiah Clinton party le Central Intelligence Agency (CIA) lei nih vun an chim. Atu lio cu mah kong hi a linsa ngaingai.
Russia nih Clinton cu President tlin ding in an duh lo caah a thli in Russia nih an computer an hack hna i, Trump teinak lam an sialpiak hna caah a si tiah an chim than. CIA nih hi bantuk bia an chuahtermi hi anmah le anmah mualphoh zong a si.
An chimmi ah tehte an langhter khawhmi a um lo. Repunlican party lei zong nih tehte kan hmuhsak u tiah an hal cang hna. Asinain zeihmanh CIA leiin an langhter kho lo. A ngaingai ti ahcun CIA cu vawleicung ah sungthoh le thlithup riantuannak ahcun a thawngbik an si.
Hi bantukin Russia an puh sawhmi hi cu anmah santlaih lo langhter le chambau taktak a si. Trump nih 'CIA hi ka zum hna lo. CIA nih an chimmi hi zoh cio u law a fiang lo tuk' tiah zarhpini ah a chim. A chim thanmi cu 'ahohmanh kan thei hna lo' a ti.
A peh thanmi cu 'Russia an si zong an thei hna lo; Taluk an si zong an thei hna lo. Minung pakhat a ihkhun cungah a thumi zong a si ko lai' tiah President thimmi Donald Trump nih a chim.
Fox News ah Trump nih a chimmi cu 'President Obama nih Russia aa tel maw tel lo a hlatter thanmi cu ka doh lo. Asinain Russia an si ti hi an chim ding a si lo. Ramdang zong si hna seh law kan thei lo. Pumpak zong si hna seh law kan thei lo' a ti. CIA nih cun Trump a bawmtu hi Russia an si tiah kan zumh an ti. Ref: VOA News.