US Secreary of State caah a hodah President Trump nih a thim te lai ti kan hngah lengmangmi cu a fiang cang. Tuan deuh ah khan Mitt Romney kha zumh ngaimi a si. Trump he zong in Trump Tower ah tonnak an ngei i, ruahchannak tam ngai he an meeting an dongter.
Trump team nih tuan ah an thanhmi cu Presdient Donald Trump nih ExxonMobil ah CEO a tuanmi Rex Tillerson a thim cang an ti. Amah hi politics lei naak in zinaan company lei kong a thei deuhmi a si. Asinain tutan ah Secretary of State caah US upa lianlian nih an duhnakpiaknak a tling.
'Rex tuanbia zoh tikah aa zuam i, aa pumpemi pa a si pinah vawleicung ah a ngancem pakhat ah aa tel i, upatmi sinaan company ah CEO a tuanmi a si tiah Trump nih a chim. A chim thanmi cu 'a theihhngalhnak kauhnak, vawleicung politics a theihnak le teiman a thluknak nih Secreatry of State tuan a phutter. Ramdang he daihnak a ser lai, kan ram himnak kongah tuanvo a tlaih khawh lai' a ti.
'Kan state department tluang tein kaarhlan pi khawhnak ding ahcun vawleicung ram pehtlaihnak a tlai thiammi a herh. Hi kongah bochan tlakmi cu Rex lawng a si. Vawleicung hruaitu hna he zong pehtlaihnak tha ngei le hawikawm tha ngei a si. Amah naak in tha deuh in timhnak a ngeimi an um lai lo tiah ka zumh. Amah naak in Secretary of State tuan ding in aa pumpe deuhmi an um lai lo' tiah Trump nih a chim.
Senate nih 11-10 in an hnatlak pi cng. Hmai zarh ah fehter a si cang lai. Rex hi Russia he zinaan kongah neihniam tuk in pehtlaihnak a ngeimi a si tiah Republican senator zeimawzat nih an lunghrinh ngai. Russia President Putin he hrim cun an pehtlaihnak a tha tuk an timi pa a si.
Mitt Romney tu cu a tla than. Trump he an i ton hnuah khan Mitt nih a facebook ah a tialmi cu Secretary of State tuan ding in Trump nih duhsaknak a ka ngeihmi cu upat tlak ngai a si tiah Mitt Romney nih a tial. Asinain Rex Tillerson sin tu ah Secretary of State post cu tlak diam dawh in a um than cang. Ref: NYP.