Nihnihni ah ISIS nih minung pali cu America le an hawile bawmtu nan si tiah an tlaih hna i, an nu le pa hmaika ah an tlai hna i, mei in an khangh hna. A hmutu pakhat nih cun ARA News ah a chimmi cu 'Syrian minung pali cu Kurdish ralkap bawmtu nan si tiah ISIS nih sual an puh hna i, mipi hmaiah mei in an khangh hna tiah a chim.
A hmutu nih a chim thanmi cu 'minung pali an tlaihmi hna hi Kurdish ralkap bawmtu an si pinah ISIS konglam lengah a chuahtertu an si tiah a luan cia thla thum ah khan an tlaih cang hna. Zumhnak pialsual le phunglam buartu an si tiah ISIS nih sual an puh hna i, mei in an kanghnak hna a si tiah a chim.
Kurdish ralkap Kurdish People Protection Unit timi hi US he ISIS dohnak ah a tang timi an si i, Syrian Democratic Force zong hi an si fawn. Minung pali an tlaihmi hna zong cu US le an hawile bawmtu nan si tiah sual an puhnak hna a si. ISIS nih an tlaih hna i bia an hal hna. Kan sual ko tiah an i phuang tiah Deir Ezzor i biaceihnak zung nih a chim.
Biaceihnak zung nih cun 'an sualman cu fak piin dantat ding an si ko' tiah tihnung dantatnak an peknak hna a si. ARA News nih a chimmi cu 'ISIS kalsual nih mipi hmaiah an thih tiang mei in an khangh hna a ti. Ka min lengah a chuah ahcun an ka theih sual lai tiah a min a langhter duh lomi pakhat nih a chimmi cu 'mei in an kangh lioah a zohtu hi a za leng an si' a ti.
'An chungkhar zong an i tel dih ko. A chungkhar zong hramhram in an fale, an unau le an ta le meikhanghnak an zohter chih hna' tiah a chim chih. Syria i Raqqa khua ah minung pakhat cu a kan sungthohtu a si tiah vailam an tah, a ni khat hnuah minung pali zong mei in an khangh hna.
Syrian Democratic Forces nih an chimmi cu 'ni 11 chung ISIS kan dohnak hna ah Syria ramchung khua 97 kan chuh cang hna. ISIS ralkap 96 kan thah cang hna i, minung pasarih kan tlaih cang hna. ISIS minung pakhat le a chungkhar zate in kan sinah an i ap' tiah ARA News ah SDF biachimtu Chin Sheikh Ahmed nih a chim. Ref: TCP.