Time Magazine nih naite ah President thimmi Donald Trump cu 'the Person of the Year' an thim i, Pi Hillary Clinton cu 'American Moses' tiah an auh. Minthang Evangelist Franklin Graham nih fak ngaiin a den hna.
Time Magazine nih Bible tha tein an rel than a hau tiah a chim. Moses nih cun Israel kha thise ramcar lakah kum 40 a vah pi hna. 'Clinton hi thim hna seh law thise ramcar lakah kum 40 chung a kan hruai ve lai tinak maw a si' tiah a hal.
Time Magazine nih a chim thanmi cu 'American tuanbia ah nu president a tling deng, asinain a sung than. American Moses bantukin, kamhmi ram chungah a kan phanh pi dengmang. Atu cun nu dang caan a si cang' tiah an tial.
Trump nih cun 'Person of the Year' an pekmi kongah 'upatnak awktlak ngaingai a si' tiah aa lawmhnak a langhter. Fox news nih a tialmi ahcun 'American politician nih an tuah bal ti lomi Trump nih a tuah' tiah a tial.
A tial thanmi cu 'American thennak tam tuk a chuahter pinah ramchung ah thinhunnak le tihnak sang tuk in a kaitertu zong a si' a ti. A donghnak fox nih a tialmi cu 'Trump presdient tlinmi cu zaang ngei lo American mipi caah teinak a si i, Trump cu an champion taktak a si' a ti. Ref: CP.