Israel Prime Minister Netanyahu tluk in Israel ram caah a dir i, a huaisenmi an um lai lo. Israel himnak le ram caah cun zeidang a ruat lomi pa a si. A herh ahcun US President Obama he zong in i phomh a ngamhmi a si. UN nih Israel ralchanhnak in vote a thlakmi hrimhrim nih a thin hunter tuk.
Ningaini ah Israel PM Netanyahu nih President Obama cu Israel ralchanhnak in UN ah biatak tein riantuanmi na si tiah a vun phomh. A chim thanmi cu 'UN nih zahpi awktlak a simi biachahnak an tuahmi hi Israel nih kan cohlang lo; a zulh zong kan zul lai lo' tiah fiang ko in a chim than. UN ah vote 14 an thlak i, 14 ning tein Israel ralchannak an tuah.
'Syria ah mipi chet tiah an thah cuahmah lio hna ah UN nih zeihmanh a tuah lo. Dai tein aa umter i, zeihmanh a thei lo bantukin a kaa aa cip, asinain Middle East ah Israel lawng democracy a simi cu min thlir tein aa thim i, UN ah kan kong a ceih. Ningzak an si' tiah fak ngaiin a phomh hna.
UN nih Israel a kan tuaitamnak hi Obama cozah zong nih pakhat hmanh aa kan veng kho lo. A thlithup tuin UN a dirkamh lehlam' tiah a chim chih. President Obama President tuan a donghnak tiang hmanh ah PM Netanyahu he an i rem lo. Israel nih cun President thimmi Donald Trump tu hi riantuan pi ding in kan hngahhlang ko cang' a ti.
Israel nih 'a rannak in New Zealand le Senegal ah ambassador kan chiahmi kan lak than hna lai. UN biachahnak a dirkamhtu le ruahnak petu an si' a ti. 'Hmai thla ah Senegal foreign minister tlawn a kan timhmi zong kan cancel than lai i, bawmhnak kan pekmi hna zong kan donghter lai' tiah a chim chih.
New Zealand Foreign Minister Murray McCully nih cun 'Israel he kan hmuh ning i dang tuk ko hmanh seh law kan ram hnih hawikawm sinak cu a hmun peng ko lai' tiah a chim. Ref: TOI.