Laimi chung in hlasak thiam tampi an um hna i, uar a um cem tiah ka ruahmi lawng si loin
Laimi society chungril tiang in a khoih kho i, hmual a kan ngeih cemtu a si tiah ka ruahmi cu Evan. Tial Uk hi a si. Evan. Tial Uk hi a hla ka ngaih tawnmi le a konglam ka theihmi lawng a si. Pumpak in ka tong bal lo; cun a pumpak nun ning le dirhmun ka thei lo.
Laimi society chungril tiang in a khoih kho i, hmual a kan ngeih cemtu a si tiah ka ruahmi cu Evan. Tial Uk hi a si. Evan. Tial Uk hi a hla ka ngaih tawnmi le a konglam ka theihmi lawng a si. Pumpak in ka tong bal lo; cun a pumpak nun ning le dirhmun ka thei lo.
Asinain a hlasak le a hlaphuah nih ka nunnak ah ruahnak tampi le thazaang tampi a ka pek. Hlasak le hlaphuah hi a nunnak thisa he aa tlaimi hrimhrim a si lai tiah ka zumh. Hlasak zong a thiam i, hlaphuah zong a thiam bak. A hlaphuahmi zong rel le ngaih tikah zaraan naak in a thiam deuh i, ruahnak (idea) zong a ngei i, Laimi chan tiluan le a hlaphuah hi liangtawng in an kal ti lengmang.
Hi capar ah hi Evan, Tial Uk kong tial kaa tim lo. A hlasak le a hlaphuahmi kong tial zong kaa tim lo. Ka tial kho lai ti zong kaa ruat lo. Asinain kahin tial ka duhmi cu 'Maw Ka Pa, Zu Cu Ding Ti Hlah' timi hi tawi tein comment pek ka duhmi a um. Evan. Tial Uk hla hi youtube in ka ngaih tawnmi a si i, an tha dih i, ngaih an nuam dih fawn. Cun bia sullam zong an ngei. A tha dihmi a hlasakmi chungah 'Maw Ka Pa, Zu Cu Ding Ti Hlah' timi hi aa telmi pakhat a si.
Youtube in ka zoh tawn tikah kan society chungah bom hlah maw a kan thlak ti tluk in ruah phumi hla a si. A hmual a pin i, kan sining a kheng taktakmi hla a si. Mah hla a ngaimi poah nih cun khua an ruat dih cio lai. Chungkhar ah pabik nih zu a din ko cang ahcun nupi le fale lawng hmanh nih tuar ti loin inn zuat sathil tiang in an tuar i, kan belkhen, ngaihchiah chawva tiang in an tuar dih.
Pabik nih zu a din cang ahcun sazuk run lak i cakei chuah bantuk a si cang. Chungkhar an tio, sathil an tio, chawva an tio, fanu-fapa an tio. A fak deuh rihmi cu chungkhar ah pabik nih zu a ding cang ahcun chungkhar rualremnak a um thiam ti lo. Zu leiba ruangah fanu-fapa nih mi mithmai an khap ti lo. Nubik zong lungthin kekkua in ni le caan a hmang cang.
Pabik nih cun ka fale lungthin ka khua sual maw; ka nupi lungthin ka khua sual maw ti zong a rak ruat kho ti lo. Nubik nih a kawl cia le a kenret tiang a suaksampiak dih. A duh caan paoh ah a mitthli a tlakter i, a duh caan paoh a lungthin a khuai than nolh lengmang. Cuticun society ah chungkhar mithmai a bi le hawi zohngar in a chiah hna i, aa dawh tukmi chungkhar cu hell ram ah a ser.
Tam deuh pi tiang hmanh tial ding an um ko nain tawi tein ka langhter duhmi cu 'Maw Ka Pa, Zu Cu Ding Hlah' timi hi a sawhsawh in phuahmi a rak si hrimhrim lo timi hi theih than kan hau. Youtube ah nan zoh cio ah cun ruah than ding a um ngai. Amah nih hla aa sak pah in zukcawl aa zeih i, minung pakhat zu ding ngai pa nih zukzawl aa zeihmi a um rih. Hi hla pakhat nih hin tampi nun chimh dingmi a kan ngei. Ngai ve law ruat than ve!