Iraq ralkap upa pakhat nih October thla in atu tiang ah ISIS an thah zat a phuan. ISIS hmunkhur a simi Mosul lak than ding in October khan Iraq ralkap le an hawile cu an tho than. Cunglei in raltuknak vanlawng nih an rak bawmh chih hna.
A zate in kan thah cangmi hna hi 4000 leng an si cang tiah a ralbawi nih a chim. Iraq khuapi a pahnihnak ah aa telmi Mosul lak ding in ral kan thawhnak in atu tiang ah ISIS kan thah cangmi hna hi 4000 leng an si cang lai tiah Iraq raltuknak i an hruaitu ralbawi Najm al-Jubouri nih nithumni ah khan a chim.
US raltuknak vanlawng nih cunglei in an rak phomh lengmang hna. Raltuknak vanlawng kahnak in a thimi hi 2,100 an si tiah a chim chih. ISIS hi an tam ti lai lo. A zammi hrimhrim an tam cang i, Mosul khua ah a ummi hna lawng hi an si ko cang tiah a chim. Syria le Iraq fonh in ISIS hruaitu kan thahmi hna hi 180 leng an si cang tiah US lei upa Stephen Townsend nih a chim.
Iraq Prime Minister Haider al-Abadi nih nikhatni ah a chimmi cu 'cheuthum ah cheuhnih cu kan lak cang. Tigris Tiva lei hi kan ralkap nih an zoh cuahmah lio a si. Mosul kan laknak ding ah cun Tigris Tiva in nichuah leiin kan kal hnawh hna lai. Nichuah leikam kan lak hmasa lai tiah a chim.
Mosul in nitlak leikam paoh cu ISIS kut ah an um rih hna. Syria ah hmun a khurmi ISIS umnak he aa ramrimi an si tikah an thawng ngai rih. Kurdish ralkap nih an rak kah lengmang ve hna. Nilini ah Iraqi Counter Terrorism Service lei upa nih an chimmi cu ISIS kut in nichuah lei sang 56 chungah 40 cu kan lak cang a ti. Ref: Iraq News.