Nihnihni ah President Donald Trump nih President thing Bill Clinton a vun nihsawh ve. Naite ah khan 'Trump nih tampi theihmi a ngei lo' tiah bia an halnak ah Clinton nih a chim. Campaign lio in a siah thimnak a dih hnu tiang a siah Bill hi a holh tuk bal lo, asinain naite ceo in a vun holh ve.
Trump nih a chimmi 'Bill Clinton nih a chimmi cu thimnak a dih hnuah ah a ka chawnh a ti. A hmaan lo. Amah nih a ka chawnh i tha ngaiin a ka conghlawmh' A chim thanmi cu Clinton nih theihmi tampi a ngei lo' tiah a bia lila in a den than ve.
A peh thanmi cu 'zeitin dah mipi kan lem hna lai timi an thei lo, campaign caah tam tuk tangka an hman pinah a biapi tukmi states ah an kal ve ko, asinain an i palh. An kalnak states an i palh. Tampi theihmi an ngei ve lo' tiah Trump nih a phomh than ve.
New York an inn pawng i Weekly Newspaper nih Clinton cu bia an hal i, 'Trump nih theihmi tampi a ngei lo. Thil pakhat a theihmi cu thinhun lawng a thiam, cun vunraang pawl nih zeitin dah an ka vote ning a si lai timi lawng a ruat thiammi a si' tiah Bill nih fak ngaiin a phomh.
President Donald Trump nih a bia ning tein a vun leh venak a si. A hnuah Bill Clinton nih twitter in a rak leh ve. A tialmi cu 'Donald Trump le keimah kan i khahnak zawn cu 'thimnak a dih in ka chawnh ve taktak ko' a ti. Cun Weekly nih bia an halnak ah Bill nih cun 'Clinton a sunghnak ruang cu Russia le FBI hruaitu James Comey an si tiah a chim. Ref: CN.