US President thimnak ah American mipi vote thui in Trump nih teinak hmu seh tiah Russia nih an rak bawmh tiah CIA nih an chim tikah Republican upa pawl cu an thinhung ngaingai.
Republican leiin upa nih an timi hna cu Russia aa tel le tel lo tehte kan hmuhsak hna seh an ti hna. Thimnak ah Russia a tel ko tiah CIA nih an chimmi hi tehte kan hmuhsak hna seh tiah Republican National Committee biachimtu Sean Spicer nih nirukni ah a chim.
'Trump teinak hi Russia ruangah a si an timi cu kan hmuhsak tuah hna seh ca' tiah fak ngaiin a vun den hna. 'Russia aa tel ruangah Trump nih a tei timi an hmuhnak tehte kan hmuhsak hna seh law kan zumh hna lai. CIA nih an zumh taktak ko ahcun zeiruangah dah an record cu an kan hmuhsak lo' a ti hna.
New York Post le New York Times ah CIA lei upa nih an chimmi cu 'Clinton thlak i Trump kaiter duh ah, Clinton campaign tuahnak le Democratic National Committee chung thilri pawl Russia nih an lakpiak hna, asinain anmah nih direct in lengah phuan loin Wikileaks sinah an lanhter i Wikileak nih an phuanpiak hna' tiah CIA lei upa nih an chimh hna.
CIA nih an chimmi hi a hmaan lomi a si i, Republican National Committee e-mail vial cu an hack bal lo an timi zong hi a hmaan lomi a si. Thimnak phichuak an lungtlin lo caah sual an puh sawhsawhmi a si a ti. Ref: NYP.