Iraq ralkap nih October thla khan Mosul ISIS an doh ning a fak chin lengmang cang. Atu tiang zong an doh peng hna. Mosul zong kaakip in an dum dih cang. Mosul chung tiang hmanh an luh hnawh chin lengmang cang hna. Thla thum chungah cun ISIS kan tei cang hna lai tiah Iraq Prime Minister nih a chim.
Nihnihni ah Iraq PM Haider al-Abadi nih Baghdad press conference ah a chimmi cu ISIS kan dohnak ah sau kan rau ti lai lo. Kan ralkap zong nih an neih chin lengmang cang hna a ti. Mosul hi ISIS kut tangah a ummi a si. ISIS ralkap zong 3000 leng an thah cang hna. Iraq ralkap zong tam ngai an thi ve cang. Mosul hi ISIS kut in an chuh khawh hna ahcun ISIS thazaang a der taktak cang tinak a si lai.
Asinain Iraq ralkap an siah federal police an siah Kurdish ralkap an siah tam ngai an thi ve hna. Mosul lak an timhnak le mipi an khamhnak hna ah nunnak aa pe i, thi a chuahmi an tam ngai cang. Mosul kan lak khawh cun a phumi a si ko an ti. Iraq ralkap nih an i harh ngaimi cu ISIS nih mipi hi an phaw ah an hmanmi hna kongah hin a si. Mah ruangah hin hmaiah fon kan i harh tuk an ti.
Nithumni ah Iraq defence ministry biachimtu General Tahsin Obrahim nih a chimmi cu 'kan i tinhmi cu Mosul dum zong a si, Mosul khua kip le khuate kip lak zong an si. Kan ralkap 100,000 hrawng nih Mosul an dum dih cang' tiah a chim chih. A chim thanmi cu kan i tinhmi dang cu mipi runven le him tein an zam khawhnak ding hi a si' a ti.
Iraq ralkap nih mipi lakah tank an hmang kho lo; miakpi zong an hmang kho lo, mah ruangah hin kan nuar ngai ko. Asinain Mosul kan luatter khawh hlan chung paoh cu kan doh hna lai tiah a chim chih. US ralkap zong nih trainign pek le a herhmi dangdang kongah an bawmh fawn hna. Ref: CNN.