Foreign policy kongah President thimmi Donald Trump policy hi zeidah a si te lai timi ahohmanh nih an tuak cio kho rih lo. United Nationas zong hi Trump cozah nih soibul in a den te lai tiah cheukhat nih cun an zumh cang.
Inn Raang he Congress he Republican kut ah a um cang bantukin zeitin dah ramchung le ramleng he riant an tuan te lai timi an ruah dawmh kho rih lo. Kan hnu zarh khan UN nih Israel inn sakmi kongah a ralchanhnak vote a thlak. Israel zong a thinhung i, Republican upa zong an lungfak tuk.
Cu hlan ah cun UN ah US nih a dirkamh tawnmi kha atutan ahcun zeihmanh tuah loin dai tein a um ziar. Bia thlithup a chuakmi cu President Obama le John Kerry nih a thli in Palestinian official upa he Israel ralchanh in khua an khang ti tiah theih a si. Asinain Obama cozah upa pakhat nih cun lih in serchommi a si tiah a phehpiak hna.Republican upa cu an thinhung kho tak cang.
President thimmi Donald Trump zong nih fak taktak in UN a vun theuh hna. 'UN hi a thawng tukmi a rak si nain atu cun hmun khat ah mibu ratnak le biachimnak hmun Club bantuk sawhsawh a si cang. Ngaihchia a si. Israel, January 20 hlan tiang cu nan lung thawng ko rih u' tiah UN cu a phomh hna i, Israel cu thazaang a pek hna.
Nithumni ah UN tuahsernak thalo cu Secretary of State John Kerry nih fianter le runven cu a timh ko nain Republican upa nih zeihmanh an relpiak lo. A chimmi vialte cu hnawmpung ah an hlonhpiak dih. January 20 cun kan thlen dih colh lai an ti. UN biachahnak zong Congress ah kan hnon lai tiah ruahnak an ngei cang.
UN tangka kan bawmhmi zong kan thlen cang lai tiah upadi chuah pi ding in Republican upa House Foreign Affairs Committee hruaitu IIeana Ros-Lehtinen nih a chim. Tuan deuh i US envoy John Bolton zong a dirkamh. Bolton hi Trump cozah chungah upa pakhat a si te lai tiah zumh a si. Ref: CNN.