Biatak tein President aa cuh nihnihni zan hna ah khan cun Clinton cu muidawh hlasak thiam Katy Perry nih a aw le zai he biatak tein a tan pi i, mipi nih an zohthla tuk hna. Trump zong thinphang in an rak chiah.
Asinain Trump nih a tei ciammam hna i, Clinton le Perry caah tonnak lam um ti dawh in ahohmanh nih kan ruat ti lo, zeicatiah an tlak ning a fak tuk. Asihmanhsehlaw New York i UNICEF Snowflake Ball ah ruah lo piin an i tong than.
Ton sawhsawh lawng hmanh si loin Pi Clinton nih Audrey Hepburn Humanitarian Award (laksawng) he ruah lo tuk in a ton i, khuaruahharnak le lunglawmhnak hani he peknak le cohlannak an ngei. A pek hlanah Clinton cu mipi hmaiah a dir i, mipi nih upatnak he an dirpi.
Perry thangthatnak bia a chimmi cu 'Katy he um tinak caan tha ka ngei cang, kan vawlei hi a tha deuhmi hmun le vawlei a si khawhnak ding ah zeitluk in dah zawnruahnak a ngeih timi ka theih. Katy nih hin vawlei nih a tonmi buainak harpi hi theih khawh taktak aa zuam i, mipi he kan phisin lo cun a si kho lo tiin mipi a funtomtu a si' tiah Pi Clinton nih a chim.
'Katy tbk minung hi kan herh chin lengmang. A duhsaknak, a thazaang le a hmurka hna hi chandeih aw naak in an thang deuh' tiah a chim chih. 2013 in UNICEF Ambassador a simi Perry cu a khuaruahhar tuk i, capo in 'ka mitthli hnawhnak ah tissue ke pe tuah u' tiah a hal hna.
'Hmurka cu ka ngei zungzal, hlasaknak hmurka, asinain hmurka ka rak ngeih bantukin atu cun hmurka ka ngei ti lo. Ka chung in Hillary nih hmurka a ka vanpiak i, cu mei cu zei tik hmanh ah a mit kho ti lai lo. A ceu tha chin lengmang lai. Kaa lawm tuk Hillary' tiah Perry nih cun a ti ve.
Tuan deuh ah khan a tlangval pa Orlando Bloom he an i then cang timi a leng nain kan i then lo timi mipi theihternak caah Orlando Bloom nih a rak zulh. Katy chungkhar zong an i tel ve. Ref: CNN.