Nizan ningani ah khan President thimmi Donald Trump le Taiwan President Tsai Ing-wen cu phone in an i chawn. Ahodah a chawn hmasatu a si ti zong a fiang rih lo. Atu hi Taluk a thinhung tuk sual lai i, bia hrocernak a um len te lai ti an phang ngaingai ko.
Taluk nih Taiwan cu a ramchung ah a ruah i, Beijing tangah zeitik ah dah ka chiah khawh te lai i, kan i fonh khawh te lai timi hi Taluk nih aa zuam lengmangmi a si. Asinain atu tiang ah cun Taiwan hi amah tein aa uk i, Taluk in Independence a kawl peng ve.
Asinain Taluk nih a sianh lo. US zong nih Taiwan cungah a duh ning in a cawlcang ngam lo. Taluk nih a ram ah a ruah peng tikah US nih pehtlaih a duh len zong ah a pehtlaih ngam lomi a si. Trump le Tsai phone chonhnak an ngei timi a than cangka in INN RAANG pi leiin fianternak a ra colh.
Taluk le Taiwan kongah US nih kan policy kan thleng lo. 'One China Policy' timi hi kan zulh peng ko' tiah US National Security Council biachimtu nu Emily Horne nih a chim. 1979 ah US nih Taiwan he diplomatic pehtlaihnak an rak hrawh cang. Taluk ram pakhat bantukin US zong nih a ruah cang.
Asinain Taiwan nih cun 'One China' timi hi an duh lo. President a tlin ah khan Tsai nih "one China' kan si lo tiah fiang ko in a chim ruangah Beijing he caan karlak pehtlaihnak an chah.
Tsai’s Democratic Progressive Party government (DPP) tu hi an sungh hlanah cun Beijing he aa pehtlai deuhmi an si.
Ningani ah cun ruah lo piin President Tsai le Trump cu biaruahnak an ngei. 'Economic, political lel security pehtlaihnak kong an ceih. President thimmi Donald Trump nih Tsai thangthatnak bia zong a chim. Tsai hi tu kum khan President a tlingmi a si.
Chan tampi chung kan pehtlaih ti hna lomi Trump nih a chonh thanmi hna cu Taluk a thin kan hunter te ko lai an ti i, Trump foreign policy kongah cheukhat Obama cozah upa hna cu an lungrethei ko. Ref: TOI.