Philippine President Rodrigo Duterte hi tu kum June ah khan President a tuan i, ramchung drug tawngmi fak piin a doh. Atu tiang ah minung 4,000 leng a thah cang hna. Mah ruangah President Obama he an kal ti kho lo. Human rights kongah Obama cawnpiak ka hau lo a ti.
Obama cozah nih drug a dohnak kongah an rak tlangtlak tawn nain anmah tlangtlak ka hau lo tiah fak piin a doh hna i, President Obama he cun a ral in an i ral cang. September i, Asian Summit zongah aa tong ding an si nain Obama nih a tong duh lo. Russia le Taluk leiah aa mer chin lengmng cang.
Philippines le US hi economic in a siah security in a siah pehtlaihnak thuk ngai a ngeimi an si. Nizan ningani ah President Rodrigo Duterte nih President thimmi Trump cu phone a chonh i i, an biaruah a thaw ngai tiah a hmutu nih a chim. A biaruah caan a tawi nain biataknak le lungthawhnak a um ngai a ti.
Duterte bawmtu Bong Go nih a chimmi cu 'kan ram hnih karlak pehtlaihnak kan pehzulh lai i, kan thawnter chin lengmang lai' an ti tiah a chim. A chim chihmi cu Trump he bia an i ruah chung vialte ah Duterte cu nih lawng te a rian ko tiah a chim chih.
Minute 7 hrawng an i chawn i, tlawn ding in sawmnak an ngei veve tiah a chim chih. Kum voi ah na ka tlawng lai tiah President thimmi Donald Trump nih President Rodrigo Duterte cu a sawm. Kum voi i East Asian Summit ah nan kan tlawng ve lai tiah Duterte nih a sawm ve.
Trump le Duterte hi an biachim le an umtu hi an i lo ngai tiah an chim pah hna. Asinain 'Donald Trump cu bigot (a ruahnak he aa kalhmi ruahnak le hmuh ning paoh a ing kho lomi) a si, keimah cu ka si lo' tiah Duterte nih a chim. Ref: TOI.