ABC News nih President Trump biahalnak an tuah i, tapung hremnak ah 'waterboarding' hi na hmang lai maw an ti. Tapung or misual (terrorist) an tlaih hna tikah bia an hal hna i, cheukhat cu biachim le an konglam kong phuan an duh lo. Mah tikah bia phuang hna seh tiah hremnak an phunphun an hman.
Hremnak phun khat an hmanmi cu 'waterboarding' ti hi a si. An hren hna i, an hmaiah puan an khuh hna i, ti an toih hna. Ti chungah a thlami bantukin an temtuar ngai. A fah zong a fak i, a tuar zong a har tukmi a si. Cucaah US cozah nih 'waterboarding' hremnak hi kan hmang ti lai maw tiah biatak tein an i elmi a si. 9/11 i US an tteih hnuah President thing Bush nih a rak hman i, President thing Obama chan ah a tla than.
President Trump nih ka hman than lai a ti i, Republican upa an siah Democractic upa an siah a thar in hman than ding in an duh lem ti lo. Asinain Trump nih cun hman ding in a duh. A chimmi cu 'ISIS tuahsernak hi a chiahhru i, kan theih bal lomi a si. Waterboarding hman zong hi a tha ko tiah ka ruah. Keimmah nih kan ruahmi cu mei cu mei in kan doh awk a si' tiah ABC News nih bia an hal lioah a chim.
Tapung kong theih kan duh ahcun kan hman awk a si ko. A tha ngai tiin ka zumh ko tiah President Trump nih a chim. Sungthoh lei upa thiamthiam zong nih 'waterboarding hi a tha ko tiah an ka chimh' a ti. President Trump nih a chim thanmi cu 'ka riantuantu upa lei nih an chimmi paoh ka ngaih ko lai. CIA director Pompeo le Defence Secratary Mattis kaa bochan ko hna lai. An hman duh lo a si le a poi hlei lo. An hman a si le a tha thiamthiam ko' tiah a chim.
Asinain ralkap lei upa nih cun waterboarding hman hi an duh lo. 2015 ah senate nih 'waterboarding' cu hman ti lo a si lai tiah upadi ah an ser cang. Senator John McCain nih cun 'a duhmi nawlngeihnak paoh in a minthu hmanh sehlaw upadi cu upadi thiamthiam a si ko lai. US ah kha bantuk hremnak phung cu kan luh pi ding a si ti lo' a ti ve. Ref: CNN.
President Trump Hi Hnulei Ah A Kir Lengmang Than Ko
------------------------------