Kum sarih Syrian hngakchia nu te Bana Alabed nih President Trump sinah ca a kuat. 'Syrian hnagkchia hna caah zeimaw tiin rian na tuan a hau, zeicatiah na fale bantuk an si i, daihnak na hmuh bantukin daihnak hmuh a duh vemi an si' tiah a tial.
December ah khan Bana le a chungkhar cu raltuknak nih a hrawh cikcekmi Aleppo in an luat kho. Turkey ah an chungkhar in khua an sa cang. Aleppo an kulh i, bom le meithal thawng lawng nih a den hna lioah Aleppo ah rak ummi a si. Vawleicung theih in an konglam twitter in a rak tial tawn.
President Trump biakamnak a tuah hlan deuh ah khan twitter in ca a rak tial i, TV in voi tam tuk Trump zong ka hmuh cang' a ti.
A tanglei hi President Trump sinah ca a kuatmi a si
Dear Donald Trump
Ka min cu Bana Alabed a si i, Aleppo khua chuak kum sarih Syrian hngakchia ka si. Aleppo ka chuah tak hlan tiang cu Syria ah a ummi ka si. Syria ramchung raltuknak ah harsatnak a tongmi hngakchia hna lakah aa telmi pakhat ka si ve.
Asinain atu Turkey ka inn ah daihnak ka ngei cang. Aleppo ah sianginn ka rak kai. Asinain bom nih kan sianginn cu a hrawh dih. Ka hawile cheukhat cu an thi hna. An kong ka ruah ah ka ngaihchia tuk. Ka sinah um ve hna sehlaw zeitluk in dah kan hei i lawmh hnga. Hmun khat ah lente zong kan i celh kho hna lai.
Aleppo cu thihnak khua a si. Atu Turkey ahcun ka chuak kho cang i kaa nuam kho cang. Sianginn zong ka kai rih lo nain sianginn ah ka kal kho cang. Mah ruangah hin nangmah (Trump) telh chih in daihnak hi a biapi tuk. Asinain Syrian hngakchia million in harsatnak an tong hna.
President na si bantukin zaangfahnak tein Syrian hngakchia khamh ko hna. Na fale bantuk an si; nangmah bantukin daihnak hmuh awk aa tlakmi an si ve ko. Syrian hngakchia hna caah riantuan naa timh ahcun keimah cu na hawi thar ka si ko cang. Syrian hngakchia hna caah rian na tuan ko lai timi ruahchannak he.
(Bana Alabed)
Atu hi Syrian cozah ralkap le raltho hna karlak ah kardaihnak an ser cang. Zei tiang dah a nguh hna lai timi theih a si rih lo. Ref: BBC.