ISIS hmunkhur in meng hleinga (15) aa hlatnak Iraq khua hmun pakhat ah vawleicung minthang evangelist Franklin Graham nih mission riantuannak sizung (Hospital) a dirh. A hmun a bit le a kauh hi akah (acre) panga kau a si i, operation tuahnak khaan pahnih le ihnak khaan 50 a si.
Sizung an dirhnak ni le caan naute lawng a si rih nain minung nunnak tam ngai an khamh manh cang hna. Iraq ah UN Humanitarian Coordinator Lisa Grande nih a chimmi cu 'Iraq hliamhma a tuarmi hna le harnak a tongmi hna caah bawmtu kan kawl lengmang hna. Kan bawm u tiah kan nawl hna' tiah a chim.
A chim thanmi cu 'atu cun kan sinah Samaritan Purse (Graham mission riantuannak) a um cangmi nih a thongthong in nunnak a khamh cang hna lai' tiah a chim chih. Doctor zong a herh ning in rian an tuan hna i a si khawh chung in nunnak khamh an i zuam hna.
'A tihnung tukmi hmun ah kan um hna i rian kan tuan hna. Kan ih lai zong ah meithal kah thawng kan theih i kan thawh pah zong ah kan theih lengmang. Fak ngaiin aa hliammi hna kan zohkhanh cuahmah lio hna an si' tiah Sizung director Dr. Elliott Tenpenny nih a chim.
An mizaw lakah nu hngakchia pakhat aa hliammi a um i, a thi dengmang cang. Asinain a rannak in doctor nih an thlop i a tha deuh ngai cang. An zohkhanh cuahmah lio a si. Minthang Evangelist Franklin Graham nih a chimmi cu 'aa hliammi lawng kan zoh khanh hna lo. A lungthin tiang in kan zohkhanh hna a ti. A chim duhmi Jesuh Khrih an zumh i, khamhnak an hmuh tiang zohkhanh ding in timhnak kan ngeihmi a si a ti.
'Jesuh Khrih nih a kan dawt bantukin kan dawtnak hna le kan zaangfahnak hmuhsak kan duh ve hna. Pathian dawtnak an theih khawhnak hnga Samaritan Purse hi an sinah kan dirhmi a si' tiah Graham nih a chimh chih. Ref: CBN News.