January 10 ah a umnak khua Chicago in President Obama nih mipi sinah Farewell Biachimnak a ngei cang lai. Kum riat chung Inn Raang chak tlaih in US a hruainak le ramdang hruaitu hna he rian an tuan tinak ah tampi chim ding a ngei lai.
2009 ah President thing George W. Bush nih Inn Raang in a Farewell Biachimnak a ngei. '2009 in Bush nih a tonmi zuamcawhnak (challenges) vialte kanmah zong nih tampi kan ton hna i, thawng ngaiin kan tei dih hna' tiah Obama nih nikhatni ah a chim.
Kan teinnak le hi tiang thawng ngaiin kan phak khawhnak hi kan ram dirhtu hna pacan zumhnak kan i tlaih caah a si' a ti. American pacan George Washington nih a luan cia kum 220 i Farewell Biachimnak a rak ngeih bantukin keimah zong nih ka zulh ve lai tiah Obama nih a chim.
'Kan ram dirhtu pacan hna nih an rak zumhmi le an rak sunhsak tukmi lam kha kan i tlaih peng. Kan ram hi thatnak leiah kan merter chin lengmang ko rih lai timi hi kan zumhnak le kan i tlaih pengmi a si' tiah President Obama nih a chim.
Chicago hi Obama nih politics aa thoknak khua a si. Harvard Law School ah a dih in Chicago ah khua a sa i, chungkhar a ser. Cun Inn Raang ah an rak phan. Chicago cu kan inn tiah an auh. Obama library zong Chicago an chiah lai. Ref: CNN.