'Zan ihnak angki kaa hruk i, bawngbi chungnawh kaa hruk lo. Ihkhun cungah an ka nam. Ka kut hri in an ka tem dih. Ka ke zong a kan tem i, ka kaa zong an ka phih. Cun an ka hruai than i, ka takkholhnak kuang ah a kan chiah than' tiah Kim Kardashian nih Paris i an luhhnawhnak kong a chim.
A umnak inn khan chung an rak luhhnawhnak kong a chimmi cu 'kutka hram ah thawngpang ka theih. Ahodah a si tiah ka auh hna. Ahohmah nih an ka let lo. A ka congtu ka auh. Ka bih hna i minung pahnih an rat ka hmuh i, minung pakhat nih rak hruai hna. Ka khan cungah cun a vun hruai hna.
Minung pahnih cu an hmai an i khuh dih. Pakhat cu police angki aa hruk. Pakhat pa nih ka Blackberry phone a ka chuh. French holh zong an thiam tuk i, Europe minung an lo ngai. Ka kutdongh hrolh a kan hal. Ka kutdonghrolh cu ka ihkhun kam cabuai ah ka chiah. $ 4 million man a si.
Kan thil mansung chiahnak bawm le tangka an ka hal than i ka thei lo ka ti. Minung pakhat nih a meithal aa chuah i, kah ding in a ka tinh. Ka pek hna i ka tangka bawm cu an bungh dih. Ka thil mansung chiahnak bawm zong ka pek hna i, an bungh dih. $ 4 million man a ka firpiak. Ka tangka cu a kan lakpiak lo. Cun ka iphone 6 le blackberry a ka lakpiak dih cun an chuak i an tli dih' tiah police sinah a chim.
Police nih cun 'hmu hna law na thei kho hna lai maw tiah an hal i, Kim nih a lehmi hna cu ka theih khawh men ko hna lai a ti. Naite ah khan Kim a luhhnawhmi minung 17 an tlaih hna. An tlaihmi hna kongah Kim le a pasal West nih lunglawmhnak puai an tuah. Zei tiang ah biaceihnak an phak cang timi theih an si rih lo. Ref: TNYP.