Iran nuclear kong cu January 2016 ah khan hnatlaknak an rak tuah cang. Kum khat a tlin kum Anniversary an tuah lioah Iran senior official pakhat nih a chimmi cu 'Iran nuclear kongah hnatlaknak kan tuah ko cang nain US nih Iran a kan huatnak hi a thang chin lengmang' a ti.
Iran nuclear a tlamtlin khawh lonak ding ah US nih a tuah khawhmi paoh a tuah dih tiah Deputy Foreign Minister Abbas Araghchi nih a chim. Iran nih nuclear a ser ruangah vawleicung ram nih dan a tat. Asinain January 2016 ah hnatlaknak an tuah i, dan an tatnak vialte an lakpiak dih.
Hnatlaknak tuahnak aa telmi hna cu US, France, Russia, Taluk le Germany le Iran hna an si. Araghchi nih a chim thanmi cu 'a luan cia thla 12 chungah hnatlaknak kan tuahmi hi US le ramdang zeimawzat nih upatnak ngei loin bia a chim. Iran a kan huatnak hi a thang chin lengmang' tiah a ti.
President thimmi Donald Trump nih campaign chung vialte ah a chim lengmangmi cu 'Iran nuclear hnatlaknak an tuahmi ka hrawh than dih lai' a ti. Asinain Iran he nuclear hnatlaknak minthutnak a tuahmi hi teinak hlawhtlinnak taktak ah President Obam nih cun a ruah.
Araghchi nih a chim thanmi cu 'US he nuclear kongah biaruhnak le hnatlaknak kan ngeihmi vialte cu fehter a si cang. Anmah he political kongah biaruahnak kan ngei ti lo. Kanmah lei nih kan hmuh ning ahcun zeizong vialte a dih cang' an ti. A chim duhmi cu Trump le a cozah nih nuclear hnatlaknak kan tuahmi an hrawk kho ti lo. Fehter a si cang. Thlen khawh a si ti lo ti a si. Ref: TOI.