Roman Catholic Church leader Pope Francis nih a chimmi cu 'President Trump hi biaceih len rih hna hlah u sih. Soisel lo tein hngak hmasa ko hna u sih' tiah mipi sinah ruahnak a cheuh hna; cun a chim thanmi cu Nazi Germany hruaitu Adolf Hitler zong kha mipi nih an dirkamh ve thiamthiam ko tiah Pope nih a ti.
Ningani ah Spanish Newspaper El Pais nih Pope Francis cu biahalnak an tuah. Pope nih a lehmi hna cu 'President Trump nih zeihmanh tuahsernak a ser hlan i, bia kan ceih ahcun kan palh tuk lai' a ti hna. An hal thanmi cu 'Trump nih a chimmi chung in zei nih dah na thin an phanter cem' tiah an hal than.
Pope Francis nih a leh thanmi cu 'Ka hngah lio a si. Pathian nih keimah hmanh hi tluk ka sual bu hmanh in caan sau tuk a ka hngah ko. Kan hngah i kan zoh rih ding a si tiah ka ruah. Keimah le keimah i chawhkenh i a caan zat hlan i, midng biaceih kha ka tuah awk a si lo' tiah dawh taktak in a leh hna. Thlarau Pacan pakhat aa hngalhnak a lang.
'Zeitin dah rian a tuan timi kan zoh lai. Zeidah a tuahmi a si kan zoh lai, Cu hnu ahcun ruahnak kan ngei te lai. Thil a can hlanah chim chung kha keimah hmuh ning ahcun aa dawh lo. Vanchiatnak a tlung lai tiah a chimchungmi prophet hna ka lo sual lai' a ti.
President Trump le Pope Francis hi mipem le vampang kongah an ruah aa tteih bal cang. Pope nih a chimmi cu 'hlei ka dawn lai ti si loin vampang ka sa lai a timi cu khawika an um paoh ah Khrihfa an si lo' a rak ti. Trump nih a leh vemi cu 'Khrihfa ka si ko. Pope biachim hi ningzak ngai a si. Biaknak upa pakhat a simi nih midang zumhnak chim hi ningzak a si' tiah Trump nih a rak chim.
'Khrihfa ka si zongah kaa lawm i, President ka simi zong ah kaa lawm. Midang nih Khrihfami a kan doh zong ka duh lo; Khrihfami thazaang derter zong ka duh lo. President Obama chan Khrihfami kan zatla tuk' tiah President Trump nih a chim chih. Ref: TCP.