Campaign lioah bia kan kamhmi hna kan deuh hrimhrim hna lai lo a ti bantukin President biakamnak a ngeih ni suimilam caan zeimawzat hnuah Obamacare cu let thannak min a thut cang. Economic thilrit zanter deuh duh ah kan thlen thanmi a si tiah Reince Priebus nih a chim.
Minthutnak ah vice President Mike Pence le Inn Raang Chief of Staff Reince Priebus zong an i tel ve. President Trump nih campaign a tuah chung vialte a doh lengmang cangmi a si. Kan let than lai i, kan thlen lai a rak ti peng cang. Zei tiang an minthutnak ah aa tel lai timi theih a si rih lo.
Ralkap thing General James Mattis zong Defence Secretary tuan ding in min a thut cang. James Mattis hi chan pi chan li chung ralkap a tuan hnuah a luan cia kum thum le a cheu ah khan a rian aa din cang. Ralkap a tuan khawh thannak ding ah President minthut a haumi cu Trump nih a thut cang.
Homeland Security Secretary caah John Kelly zong a fehter cang. President le vice president biakamnak an tuah hnuah Mike Pence nih Mattis le Kelley cu biakamnak a tuahter ve hna. President Trump cu media he biaruahnak tawi a ngei; kaa manh lo tuk, asinain a tha tuk, a sunglawi tuk' a ti hna.
US Congress hi Republican nih cung he tang he an uk cang. Obamcare let thannak kongah a herhmi an tuah cang. Trump nih min a thutmi zong Simple Majority hnatlaknak in an tuahpiak te lai. Obama chan ah khan voi 60 leng tiang thlen ding in vote an thlak nain Obama nih office tlaih chung poah cu thlen awk a tha lo. Asinain tu cun an thlen cang lai. Ref: VOA News.