Thimnak tuah hlan i campaign an tuah cuahmah lioah Democratic National Committee e-mail cu theih lomi minung nih an hack hna. Asinain Russian an si tiah puh le zumh an si. President thimmi Donald Trump nih cun 'an daithlan tuk caah an hack' hna a ti.
Tuan deuh lioah Democratic party le Clinton e-mail hack nak kong Julian Assange nih zeimawzat a rak phuan. Mipi cheukhat nih an zumhmi cu Russian nih an hack mi vialte hi Julian sinah an pek i, an phuantermi a si tiah an zumh. Asinain nithumni ah Wikileak founder Julian Assange nih 'Russian nih an ka pek i, ka phuanmi a si lo' a ti.
President thimmi Donald Trump nih a chimmi cu 'Julian Assange nih a chimmi cu kum 14 tluk minung zong nih a hack khawhmi hna a si ko' a ti tiah Trump nih a chim. 'Zeiruang ah dah Democratic National Committee cu an daithlan tuk? Russian nih Julian sinah information hrimhrim zong an pe lo' tiah Trump nih a tweet.
Trump nih a tweet mi hi US sungthoh hruaitu upa he tonnak an ngeih lai zarh ah nihnihni ah a si. Russian nih DNC le Clinton campaign hi an hack taktak maw timi kong zoh tinak an ngei lai. President thimmi Trump le sungthoh lei upa cu thaizing kip i ningani ah tonnak an ngei lai.
Russian hack kongah tuan deuh ah aa tong ding an si cang nain ningani ah an thawn than. Trump nih a mawhchiat than. 'Khuaruahhar an si ko. Russian hack mi a si ko timi tehte langhter an duh caah caan a lak khunnak a si' tiah Trump nih nihnihni zan ah a tweet. Ref: TNYP.