"Israel ralkap cu kan fapa le kan fanu lawng te an si. Kan miphun dihlak in kan ralkap cungah tuanvo kan ngei dih hna. Kan ralkap cu huatnak le dohnak cungah an ummi an si. Elor Azaria ngaihthiam ding in ka dirkamh ve" tiah Israel Prime Minister Netanyahu nih a chim.
Israel ralkap Elor Azaria cu Israel ralkap biaceihnak zung (Court) nih Palestinian tapung na thah tiah nithumni ah sual an phawt. A luan cia thla hra ah khan kum 19 Azaria nih Palestinian tapung Abdel Fattah al-Sharif cu a lu ah a kah.
Hebron ah Israel ralkap namte in sawh a timh lioah an kah i, an hliamh, asinain minute 15 a rauh hnuah Elor Azaria nih a luh ah thih lak in a kah lawlaw. Azaria nih a chimmi cu 'kan hliamh cang ko zong ah kan caah ral peng a si caah ka kah' tiah a chim.
Biaceihtu Col. Maya Heller nih cun Azaria biachimmi a cohlanpiak lo zeicatiah Azaria biahcimmi aa kalh a ti. Azaria nih aa palhmi cu a thih hnu ah a lu ah ka kahmi a si tiah a chim chel; kan caah ral a si tiah ka kah a ti chel a si caah a biachimmi cohlanpiak awk a tha lo a ti. 'Bochan awktlak lo' tehte a si tiah biaceihtu nih Azaria cu a ti.
'Azaria biachimmi hi cohlanpiak awk a tha lo. A lu a kah chapmi hi tapung cu thih awk an tlak ko tiin a kah chapmi a si' tiah biaceihtu Heller nih cun a chim. Ralkap lei upa nih cun Azaria tuahsernak aa dawhcah lo an ti ko nain ralkap dangdang hna nih cun Azaria an dirpi cio. Hliamh cangmi le tlaih cangmi tapung a siah thah tbk hi Israel sungthoh bu le ralkap uapdi nih a onh lomi a si.
Israel ralkap lei upa nih an thinphanmi cu 'Azaria hi luatter u sih law international community leiin hmurka a tam thiamthiam lai caah a hmaan ning tein thil tuah a tha ko tiin Azaria tu sual an phawtnak a si. Asinain Sharon Gal nih a chimmi cu 'biaceihtu nih Azaria sual an phawtmi cu tuang ah a tlami namte char hna seh law Israel ralkap vialte hnulei keng ah sawh bantuk a si' a ti.
Azaria sual an phawtmi nih mipi zong fak tukin an thin a hunter hna. Israel Defence Mnister Avigdor Lieberman nih cun 'biaceihnak zung thil tuahmi hi ka hnatlak pi hna lo nain mipi nih biaceihnak zung biachah hi kan upat ding a si ko a ti. Ref: CBN News.