North Korea ah American thongtla pali an um. Nizan ah Otto Warmbier cu thla 17 a tlak hnuah a chuak cang. College kai lio a si i, North Korea a tlawn lioah an tlaih. Kum 15 chung thongthlak ding le rian hraang tuan ding in bia an khiahpiak.
Thong a tlak chungah a chungkhar nih a konglam an thei kho lo. Lungrethei ngaiin an um. Asinain ruah lo piin North Korea nih nihnih ah kum 22 pa cu a chuah than. An thlah ah hin cun lungfim loin a chuak an ti. Thonginn chung a um ah hin a dam lo ngai.
Nihnihni ah US a phan cang. Cincinnati Medical Center ah thlop ding in a chungkhar nih an chim. Sungthoh nih an chim ning ahcun thong chung a um lioah hin ni fatin in an tuk i an velh lengmang. US thlithup kong an hal lengmang. An hrem ning zong a fak ngai an ti.
January 2016 ah North Korea khuapi Pyongyang Airport ah an rak tlaih. North Korea nawlngeihtu nih an chimmi cu 'hotel a tlunnak vampang cungah tarmi ramkhel konghe aa tlaimi banner fir a timh an ti. Mah ruangah cun kum 15 chung thongthlak ding in a bia an rak khiahpiak.
North Korea thong ah a um rihmi hna cu Kim Sang Duk, Kim Hak-song le Kim Dong Chul an si. US Secretary of State Rex Tillerson nih a chimmi cu 'an luatnak ding ah kan i zuam lengmang ko. Norht Korea ah embassy kan ngeih lo caah thil har ngai a si. Kan zuam lengmang ko' tiah a chim.
Thong in Otto an chuah ni kha basketball celh thiam Rodman cu North Korea a tlawng. Zei kongah dah a tlawn timi theih a si lo. Rodman nih Otto chuahnak hi a khaanpiakmi a si ko lai a timi zong an um, asinain US official nih cun Otto chuahnak le Rodman pehtlaihnak an ngei lo a ti. Ref: CNN News.