President Trump cozah nih Jerusalem ah US embassy thial ding an timh cuahmah lio a si. Tuan ah maw a si lai, tlau deuh ah dah timi cu an fiang cio rih lo. Trump nih cun 'a rannak in kan thial lai a ti i, Inn Raang Press Secretary nih cun 'biachahnak kan ngei rih lo' a ti ve.
Zeidah A Biapimi A Um?
US nih a embassy a thial taktak ahcun Jerusalem hi vawlei pi theih in Israel khualipi a si ko tiah a cohlannak a langhternak a si cang lai. Kum 70 chung International nih an buai pi pengmi zong a dih cang lai. Asinain Middle East ah zeitluk in dah buainak a chuahter lai timi cu theih a si lo.
Jerusalem Cuhnak Tuanbia
1947 ah UN nih Jerusalem cu 'International City' in an rak hmuh. Asinain 1949 ah Jerusalem cu a kuai i, nichuah lei cu Jordan kut ah a um i, cheukhat cu Israel ah a um. David Khuapi zong Jordan ah a um chih.
1967 ah Six Day War a chuak i, Israel nih Jerusalem cu a ning piin an lak dih. Mah hnu cun Israel nawlngeihnak tangah a um cang. Asinain International Community le Palestinian nih cun Jerusalem in nichuah lei paoh cu hmailei Palestinian khuapi a si te lai tiah an ruah peng.
Jerusalem ah aho tel nih Embassy An Chia Cang Maw?
1980 hlanah Netherland le Costa Rica nih an embassy an rak chiah ko. July 1980 ah Israel nih upadi an ser i, Jerusalem cu Israel United khualipi a si cang an rak ti. Asinain UN nih Israel biachahnak an rak cohlanpiak hna lo. International Phung nan buar an rak ti hna.
Mah hnu ahcun 2006 in cun Costa Rica le El Salvador zong Tel Aviv ah an embassy an thial. Atu lio Israel khuapi Tel Aviv ah ram kip embasssy an rak chiah cio hna.
1995 ah US Congress nih upadi an ser i, Jerusalem ah kan embassy kan thial lai an rak ti. Israel duhnak kan cohlanpiak hna i kan upatpiak hna ding a si tiin hnatlaknak an rak tuah. Asinain zeiruangah dah atu tiang an thial bal lo?
President thing Bill Clinton in Bush in Obama chan tiang an thial lo. Kan thial ahcun Israel security caah a tihnung tuk lai an ti. President Trump nih thial duh seh law zeidah a tuah awk a si?
1989 ah US nih Israel sinin Jerusalem ah ram (hmun) an rak cawkmi a um. Cucu an hman khawh. A pahnihnak cu Jerusalem ah US embassador umnak a um, cu zong cu an embassy ah thlen khawh a si. A pathumnak cu Tel Aviv ah an embassy chiah ko i, Jerusalem in ambassador nih an riantuan khawh thiamthiam a si.
Israel nih zeitin dah an ruah?
President Trump nih biakamnak a tuah bantukin US embassy hi Jerusalem ah thial zokzok seh ti an duh. Naite ah Jerusalem khuabawi Nir Karkat nih a chimmi cu President Trump nih a chim bantukin embassy hi Jerusalem ah thial zokzok seh. Lunglawm tein kan don' a ti.
Palestinian nih zeitin dah an tuah ve lai?
An thial taktak ahcun International phung an buar pinah daihnak an hrawh tuk lai an ti. Palestinian President Mahmoud Abbas nih vawleicung hruaitu a panh thluahmah cang hna. Russia President Putin zong a ton i, Jordan President King Abdullah zong a ton. President Trump hi preasure nan pek lai tiah a forh hna.
The Palestine Liberation Organization nih kan au ve lai a ti. Israel zong ram pakhat ah cohlan an rak sinak kan chuah pi than ve lai an ti; Israel le Palestinian karlak ah hnatlaknak kan tuahmi vialte zong kan hrawh than dih lai an ti; Muslim vialte kan buai dih lai an ti. Ref: CNN.