Zarhpini ah State Counselor Daw Aung San Suu Kyi cu Shan State, Panglong khua ah bia a chim. Panglong cu Kawlram political tuanbia ah sullam a ngei tukmi a si. A voi 70th Union Day zong ah Panglong khua ah bia a chim.
Biapi ngaiin a chimmi cu nationwide ceasefire agreement (NCA) ah min a thu rih lomi vialte thu ding in a sawm hna. Kan dawng tein Union Peace Conference (February 28) ah kan i tel dih hna lai tiah a forh hna. Voihnih bak tein a nolhmi cu 'raltha le zumhnak he' NCA min kan thu hna lai a ti.
Atu tiang hriamtlai bu 8 lawng nih min an thut rih i, bu riat hrawng cu an tang rih. Daw Suu nih biapi ngaiin a chimmi biafang pahnih hna cu: 1) daihnak kan hmuh khawhnak ding ah pakhat le pakhat zumhnak kan herh' a ti. Hriamtlai bu karlak zong ah zumhnak an i ngeih a herh i, ralkap le hriamtlai bu karlak zong ah zumhnak ngeih an herh.
2) A kan zuamcawhtu (challenge) taktak a si tiah ka ruah rimi cu 'self-confidence' hi a si a ti. Hihi hriamtlai bu hna caah ruahchannak/thazaang pek a duhmi hna maw a si lai timi kan thei lo. A chim thanmi cu 'mah le mah zumhnak (self-confidence) kan ngeih cio ahcun 21st Century Panglong conference ah kan i tel lonak ding a ruang a um lo tiah a chim chih.
Union Day ah a chim duhmi 'point' a si ko tiah ka ruahmi cu, 'Panglong hnatlaknak kan zoh ahcun hnatlaknak chuah pi/hmuh khawhnak ding ah ruahnak cheuhnak, ceihmai tinak le khuakhan lairel tinak timi ruahnak (idea) charhchan in rak tuahmi a si tiah kan hmuh' a ti. Chin, Kachin le Shan States hna nih Burma Proper he Panglong Hnatlaknak ( February 12, 1947) an tuahmi thawngin Union kan ngei timi muisam a leng ti lo.
Union Day hna ahcun Union Founding states le fathers zong philh lo ding an si. Upat zong pek hna ding a si. Asinain Daw Suu biachim ning khin cun Union Day hi tuanbia ngei lo bantukin Union Day a ngeimi kan lo cang. Shan upa leiin Sai Aung Myint Oo zong nih a chimmi cu Daw Suu nih '21th Century Panglong Conference lawng a ruah pengmi hi a dernak a si' a ti.
A chim thanmi cu 'Ethnic Group kip nih 1947 ah rak sermi Panglong Hnatlaknak cungah khuakhan lairel hi kan ruahchanmi a si cang' tiah a chim chih. Cun 1947 ah Panglong Hnatlaknak rak tuah cangmi kha atu cu nun tar cang ding in kan ruah, asinain aa theihter duh lo' tiah upa tampi zong nih an chim. Cucaah Daw Aung San Suu Kyi biachim ning cun hmailei hi a hla ngaimi a lo ko rih. Ref: Irrawaddy News.