Zarhpini ah North Korea nih nuclear a phur khom missile hlawhtling ngaiin kan hneksak khawh cang tiah an vun fehter. North Korea hruaitu Kim Jong-un tel pinak in an hneksak. January ah Kim Jong-un nih 'US a kap khomi kan hneksak caan a nai cang' tiah a rak chim.
President Trump nih cun 'an hneksak lai lo' a rak ti. US Defence Secretary James Mattis zong nih Japan a tlawn lioah a chimmi cu 'North Korea nih a missile an hneksak ahcun fak taktak in kan lehrul lai' a rak ti i, Soutk Korea zong ah a tha taktakmi US Missile THAAD kan chiah lai a ti.
Kim Jong-un nih cun 'kaa lunghmuih tuk. Kan ram thazaang taktak a si cang' tiah lunglawmhnak a chim chih. South Korea upa nih cun nih 'meng 350 tiang a kal khomi a si an ti. Expert nih an chim thanmi cu Japan ah a tla sual lai tiah nai deuh ah thla ding in an kahmi a si an ti.
Japan Prime Minister Shinzo Abe zong US a tlawn lio a si. President Trump kam ah a dir i, 'North Korea cawlcangh hi zoh sawhsawh awk a tha hrim lomi a si' tiah fak ngaiin a chim. President Trump nih '100% in Japan kan in dirpi hna. Japan nan hnuin kan dir ko' tiah a chimh than.
North Korea hawi tha Taluk leiin zeihmanh mawhchiatnak bia a ra rih lo. International community nih cun North Korea an rak mawchiat len cang. Taluk zong nih a vun chim te ko lai tiah zumh a si. US le Japan le South Korea nih cun a rannak in UN meeting kan auh a hau an ti. North Korea kong an ceih colh lai tiah zumh a si. Ref: BBC.
North Korea Hruaitu Kim Jong-un Nih Trump Ca A Kuat
--------------------------------
North Korea Le US Karlak Hrocernak An Linsa Than
---------------------------