President thing Obama le Australian Prime Minister Turnbull tonnak an rak ngei i Australia ram Island pakhat ah an chiahmi refugee 2,000 kong an rak ceih. President Obama nih US ah lak ding in hnatlaknak a tuah pi hna, asinain tam deuh cu Trump nih a khammi Muslim ram an si.
Nizan nirukni ah President Trump le Australian Prime Minister Malcolm Turnbull cu phone chung in biaruahnak an ngei i, refugee kong an ceih. Asinain Obama nih refugee lak ding in biachahnak a rak tuahmi ka cohlang kho lo tiah Trump nih Australian Prime Minister Malcolm Turnbull cu a ti diam.
Australia hi US hawi tha ngai pakhat a si. An holh hmanmi zong aa khat i, security kong zong ah riantuan ti an si i, sungthoh zong ah riantuan ti an si. Sungthoh riantuannak ah hin mirang holh hmangmi ram nga an i tel i, 'Five Eyes' tiah an i au. Pakhat le pakhat an i pehtlaihnak zong hi theihthiamnak le lungthin khat in riantuan timi an si hna.
Nirukni phone an i chawnh lioah cun President Trump nih hnatlaknak tuahmi refugee 2,000 ka la kho hna lo a ti, asinain Turnbull nih cun 2,000 an si lo, 1250 an si a ti. A chim thanmi cu US nih kan ram refugee nan lak dingmi tha tein screening nan tuah ko hna lai; screening a awng lomi cu nan la hna lai lo a ti zong ah Trump nih a duh lo.
Trump nih President nawlngeihnak in min a thut cang fawn tikah zeitin dah Obama hnatlaknak kan lanh pi lai timi kongah dawnkhaantu a um cang. Cucaah an biaruah a har caah Australian Prime Minister Malcolm Turnbull nih ruah lo piin a phone a chiah kanh diam i, an biaruahnak zong a dong.
Nilini ah President Trump nih fiang tein twitter ah a tial cang. Australia in ningcang lo mipem lak ding in Obama nih hnatlaknak a tuahmi hi a si kho lai tiah nan zumh maw a ti. 'Hi a hrutmi hnathlaknak hi tha tein ka zoh hmasa dih lai' tiah a chim chih. Tuan deuh ah khan Trump cozah nih Obama hnatlaknak a tuahmi hi a cohlanpiak te ko lai tiah Spicer nih a chim. Tha tein zoh cu an hau te lai tiah a chim chih. Ref: CNN.
Trump Thawngin Israel Ral A Tha Kho Tuk Cang
-----------------------------------
------------------------------------