US Defense Secretary James Mattis cu nirukni ah Japan a phan. South Korea a tlawn hnuah Japan a rak lanh pah a si. A rak tlawnmi hi US le Asia an hawile pehtlaihnak caah a biapi ngaimi a si. US nih Japan runven ding hi kan i hmaithlak pengmi a si ko tiah bia a kamh than hna.
Taluk he an i cuh i an buai pi ngaimi Island 'Senkaku' kongah fiang tein chim kan duhmi cu US nih kan dirpi tawn bantukin kan dirpi peng ko lai. Senkaku Island cu Japan ramchung a si ti hi US kan dirhmun peng a si ko' tiah a chim than. US-Japan Security Treaty an tuahmi Article 5 ah a ummi cu 'Japan ramchung a simi paoh cu US nih ka runven lai tiah biakamnak a tuah.
Cu chungah Senkuka zong aa tel chih. Taluk nih cun Diaoyus tiah an au ve. Taluk le Japan karlak ah theihthiam lonak le buainak a chuahtertu lengmangtu a si. James Mattis nih Japan a tlawn i, Japan cungah US dirhmun a chim tlawmpal ah Taluk nih an vun leh colh ve. Senkuka cungah US dirhmun hi pawngkam ram dirhmun a fehfuan lotertu a si an ti.
Taluk leiin an chimmi cu 'Senkuka a siah pawngkam Island dangdang an siah hlanchan hrimhrim in Taluk Island an si cang. Thlen awk a tha lomi tuanbia hmaan a si. Japan-US biakamnak tuahmi cu Cold War nih a chuahtermi a si. US-Japan pehtlaihnak nih kan ram cungah Taluk nawlngeihnak hi a dawnkhanh i, a buar ding a si lo' tiah Taluk Foreign Ministry lei biachimtu Lu Kang nih a chim.
'Senkuka (Diaoyu) Island kongah US nih a hmaan lomi biachim hi ngol cang seh law a hmaan lungput ngeih khawh zuam cang seh' tiah Lu nih a chim chih. Japanese Prime Minister Shinzo Abe le James Mattis cu ningani zan ah an i tong. 'Island kongah cun thil thar kan tuah lo. Kan dirhmun pengah kan um ko' tiah a fehter than. President thing Obama chan lio dirhmun peng a si ko.
Japan ah US ralkap 52,000 an um. Japan nih US ralkap caah tangka an dihmi a tam ngai. Cu zong cu Mattis nih lunglawmhnak le thangthatnak a chim chih. 'Japan hi kan thilrit aa hrawm i a man a liammi zohchun awktlak nan si. Ramdang zong nih nan tuahsernak zulh awktlak a si' tiah a thangthat fawn hna. Ref: CNN.
Inn Raang Le Federal Biaceihnak Raldohnak: A Herh Ahcun Supreme Court Zong Kan Phan Lai
--------------------------------------